ខេត្តកណ្តាល ៖ សមត្ថកិច្ចធ្វើការឃាត់ខ្លួនបុរសជនជាតិចិនម្នាក់ ក្រោយប្រើអំពើហិង្សាដោយចេតនា បណ្តាលឲ្យមានអ្នករបួស និងធ្វើឲ្យខូចខាតដោយចេតនា កាលពីវេលាម៉ោង ៥និង ២៩នាទីល្ងាច ថ្ងៃទី១២ ខែមិនា ឆ្នាំ២០២៤ ស្ថិតភូមិដីឥដ្ឋកោះផុស៣ ឃុំដីឥដ្ឋ ស្រុកកៀនស្វាយ ខេត្តកណ្តាល ។
តាមរបាយការណ៍ពីសមត្ថកិច្ចបានឲ្យដឹងថា ជនរងគ្រោះមានឈ្មោះ លន់ វិរៈ ភេទប្រុស អាយុ២៧ឆ្នាំ ជនជាតិខ្មែរ មុខរបរលក់ដូរ មានទីលំនៅភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល ។
ចំណែកជនសង្ស័យមានឈ្មោះ អា ហ្វី ភេទប្រុស អាយុ៣៣ឆ្នាំ ជនជាតិចិន មានស្រុកកំណើតប្រទេសចិន មិនមានទីលំនៅច្បាស់លាស់ (ឃាត់ខ្លួន) ធ្លាប់ប្រើប្រាស់គ្រឿងញៀនអស់រយៈពេល១០ឆ្នាំមកហើយ នឹងមិនមានលិខិតឆ្លងដែនទេ។
ក្នុងនោះ សម្ភារៈខូចខាតរួមមាន បែកកញ្ចក់ខាងមុខរបស់រថយន្ត ម៉ាក TOYOTA PRIUS ពណ៌ស ពាក់ផ្លាកលេខ ភ្នំពេញ 2BG-5135 ។
ចំណែក វត្ថុតាងចាប់យករួមមាន ដំបងឈើមូលដើមប្រេងខ្យល់ ទំហំ៦មីលីម៉ែត្រ ប្រវែង១,១៨ម៉ែត្រ ។
សូមបញ្ជាក់ថា មុនពេលកើតហេតុ ជនរងគ្រោះបើកឡានដឹកប្រពន្ធរបស់ខ្លួនមកមន្ទីពេទ្យឯកជន ដែលមានផ្លាកយីហោ (បន្ទប់ពិគ្រោះជំងឺទូទៅមនុស្សចាស់និងកុមារ) នៅភូមិដីឥដ្ឋកោះផុស៣ ឃុំដីឥដ្ឋ ស្រុកកៀនស្វាយ ខេត្តកណ្តាល ដើម្បីដាក់សេរ៉ូម ។ ពេលកំពុងដាក់សេរ៉ូម ជនរងគ្រោះបានដើរមកយកទូរស័ព្ទនៅក្នុងរថយន្ត ក៏ស្រាប់តែឃើញជនសង្ស័យបានដើរឆ្លងថ្នល់មកចាប់ទាញទ្វារថយន្តរបស់ជនរងគ្រោះ ពេលនោះជនរងគ្រោះបានចេញពីក្នុងរថយន្តមកក្រៅ ជនសង្ស័យបានយកដំបងឈើដើមប្រេងខ្យល់ទំហំ៦មីលីម៉ែត្រ ប្រវែង១,១៧ម៉ែត្រ ដែលកាន់នៅនឹងដៃវាយទៅលើជនរងគ្រោះ១ដំបងត្រូវចំកំភួនដៃឆ្វេង និង១ដំបងទៀតត្រូវចំខ្នងដៃឆ្វេង បណ្តាលឲ្យរបួស។
បន្ទាប់ពីធ្វើសកម្មភាពរួចជនសង្ស័យ បានមកឈរនៅខាងក្រោយរថយន្តរបស់ជនរងគ្រោះដោយដៃកាន់ដំបងឈើមូលដដែល ។ ភ្លាមនោះស្រាប់តែជនសង្ស័យបានរត់ចូលទៅក្នងរថយន្តរបស់ជនរងគ្រោះ រួចបិទទ្វារថយន្ត ឃើញដូចនេះជនរងគ្រោះបានរត់ទៅបើកទ្វារថយន្តរបស់ខ្លួន រួចក៏ប្រតាយប្រតប់ជាមួយជនសង្ស័យបណ្តាលឲ្យបែកកញ្ចក់រថយន្តខាងមុខរបស់ជនរងគ្រោះ ពេលឃើញសកម្មភាពដូចនេះក៏មានប្រជាពលរដ្ឋមកជួយចាប់ជនស្ស័យ រួចក៏ទូរស័ព្ទប្រាប់នគរបាលប៉ុស្តិ៍ដីឥដ្ឋ ពេលទទួលបានពត៌មានភ្លាមកម្លាំងប៉ុស្តិ៍ដីដ្ឋបានចុះទៅដល់កន្លែងកើតហេតុឃាត់ខ្លួនជនសង្ស៏យយកមកប៉ុស្តិ៍ដើម្បីសាកសួរ។
នៅចំពោះមុខសមត្ថកិច្ច និងអ្នកបកប្រែជាភាសារចិន ជនសង្ស័យបានសារភាពនិយាយជាភាសារចិនថា ខ្លួនបានចូលមកប្រទេសកម្ពុជាតាមច្រកព្រំដែនភូមា ហើយបានរស់នៅក្នុងប្រទេសកម្ពុជាអស់រយៈពេល០៥ឆ្នាំហើយ ហើយបានដើររស់នៅគ្រប់ទីកន្លែង ដូចជារស់នៅក្នុងខេត្តប៉ោយប៉ែត ខេត្តព្រះសីហនុ និងក្រុងភ្នំពេញ ហើយមិនមានទីកន្លែងស្នាក់នៅច្បាស់លាស់ទេនិងដើរធ្វើការងារគ្រប់ទីកន្លែងរហូតមកដល់ថ្ងៃទី១២ ខែមីនា ឆ្នាំ២០២៤ វេលាម៉ោង៥ និង២៩នាទីល្ងាច ខ្លួនបានដើរតាមផ្លូវក៏ឃើញមានរថយន្តមួយគ្រឿងចតទុកចោលនៅក្បែរផ្លូវ ខ្លួនក៏បានដើរទៅក្នុងគោលបំណងខ្ចីទូរស័ព្ទរបស់ជនរងគ្រោះដើម្បីទូរស័ព្ទទៅរកមិត្តភក្កិរបស់ខ្លួន តែជនរងគ្រោះមិនឱ្យទូរស័ព្ទខ្ចី ទើបខ្លួនយកដំបងឈើទៅវាយជនរងគ្រោះ នឹងប្រតាយប្រតប់គ្នាជាមួយជនរងគ្រោះក្នុងរថយន្តរហូតបែកកញ្ចក់ខាងមុខរថយន្ត ហើយខ្លួនធ្លាប់ប្រើប្រាស់គ្រឿងញៀនអស់រយៈពេល១០ឆ្នាំមកហើយតាំងពីនៅប្រទេសចិនរហូតមកដល់ប្រទេសកម្ពុជា ក្រៅពីនេះខ្លួនមិនដឹងអ្វីទៀតទេ ។
ក្រោយពីសាកសួរជនសង្ស័យរួចកម្លាំងជំនាញបានសុំគោលការណ៍មេ ឃាត់ខ្លួនជនសង្ស័យរួមទាំងវត្ថុតាង បណ្តោះអាសន្ននៅអធិការនគរបាលស្រុកកៀនស្វាយ ដើម្បីកសាងសំណុំរឿងចាត់ការតាមនីតិវិធីច្បាប់ ៕ អែល វិចិត្រ
