រាជធានីភ្នំពេញ ៖ ប្រជាពលរដ្ឋបានប្រទះឃើញសពបុរសម្នាក់ ស្លាប់ក្នុងសភាពដុតឆេះខ្លោច ក្នុងដីឡូតិ៍មួយកន្លែង ក៏ប្រញាប់រាយការណ៍ជូនសមត្ថកិច្ច ដើម្បីចុះមកធ្វើការពិនិត្យស្រាវជ្រាវ ។
ហេតុការណ៍នេះបានកើតឡើងនៅវេលាម៉ោង ៩និង ៣០នាទី ថ្ងៃទី ២១ ខែកក្កដា ឆ្នាំ២០២៤ នៅចំនុចដីឡូតិ៍គ្មានលេខ ផ្លូវ លំ ភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ។
តាមរបាយការណ៍ពីសមត្ថកិច្ចបានឲ្យដឹងថា ជនរងគ្រោះ ដែលស្លាប់មានឈ្មោះ វណ្ណ សៅ អាយុ ៣៦ឆ្នាំ ភេទ ប្រុស ស្នាក់នៅមិនពិតប្រាកដ, ស្រុកកំណើតនៅ ភូមិទួលច្រេះ ឃុំកំពង់អំពិល ស្រុករំដួល ខេត្តស្វាយរៀង។
តាមរបាយការណ៍ពីសមត្ថកិច្ចដដែលបានឲ្យដឹងថា មុនពេលកើតហេតុ ជនរងគ្រោះធ្លាប់បួសជាសង្ឃ ក្រោយមកក៏បានសឹកវិញដោយខ្លួនឯង, ហើយបានថតវីដេអូបង្ហោះនៅលើបណ្តាញសង្គម ហ្វេសប៊ុក សុំអភ័យទោសដល់ឪពុកម្តាយ រៀបរាប់ប្រាប់ពីគោលបំណងរបស់ខ្លួន ចង់ដុតសម្លាប់ខ្លួនឯងដើម្បីសម្រេចបំណងថ្វាយដល់ព្រះសម្មាសម្ពុទ្ធ ។ លុះដល់ថ្ងៃទី ២១ ខែកក្កដា ឆ្នាំ២០២៤ វេលាម៉ោង ០៩និង៣០នាទី ក៏មានប្រជាពលរដ្ឋដែលដើរទៅម្តុំកន្លែងកើតហេតុខាងលើ រកកន្លែងស្ទូចត្រី ប្រទះឃើញសាកសព ឆេះខ្លោច ជាមនុស្សប្រុសម្នាក់ ហើយរាយការណ៍មកសមត្ថកិច្ចតែម្តង ។
តាមការធ្វើកោលស្យវិច័យពិនិត្យសាកសពជនរងគ្រោះជនរងគ្រោះយ៉ាងយកចិត្តទុកដាក់ ជនរងគ្រោះ តេស្តិ៍ទឹកនោមមានសារធាតុញៀន ប្រភេទ មេតំហ្វេតាមីន ហើយបើ តាមការពិនិត្យរបស់ការិយាល័យនគរបាលបច្ចេកទេស និង តាមការពិនិត្យរបស់លោកឧកញ៉ា វេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យរាជធានីភ្នំពេញ បញ្ជាក់ថា ស្លាប់ដោយសារ ឆេះ ឈ្លក់ ( អត្តឃាត ដុតសម្លាប់ខ្លួនឯង ) និងប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕ អែល វិចិត្រ
