អន្តរជាតិ៖ សារព័ត៌មាន BBC បានចេញផ្សាយនៅព្រឹកថ្ងៃទី១៨ ខែឧសភា ឆ្នាំ២០២១ បានឲ្យដឹងថា ប្រធានាធិបតីអាមេរិក លោក Joe Biden បានសម្តែងការគាំទ្រចំពោះបទឈប់បាញ់ បន្ទាប់ពីមានអំពើហិង្សារយៈពេល ៨​ថ្ងៃ រវាងអ៊ីស្រាអែលនិងក្រុមសកម្មប្រយុទ្ធប៉ាឡេស្ទីននៅតំបន់ហ្គាហ្សា។

លោក Biden បានប្រាប់នាយករដ្ឋមន្រ្តីអ៊ីស្រាអែលលោក Benjamin Netanyahu ថា សហរដ្ឋអាមេរិកកំពុងធ្វើការជាមួយអេហ្ស៊ីបនិងប្រទេសដទៃទៀតលើការបញ្ឈប់អរិភាព។ ប៉ុន្តែសហរដ្ឋអាមេរិកបានរារាំងសេចក្តីថ្លែងការណ៍របស់ក្រុមប្រឹក្សាសន្តិសុខអង្គការសហប្រជាជាតិម្តងទៀត ដោយអំពាវនាវឲ្យបញ្ឈប់អំពើហិង្សា។

គិតមកត្រឹមពេលនេះ ជម្លោះនេះគឺស្ថិតនៅក្នុងសប្តាហ៍ទី​២​ហើយ ដែលមានសញ្ញាតិចតួចនៃការបញ្ចប់ជម្លោះ។

យ៉ាងហោចណាស់មានមនុស្សចំនួន​២១២​នាក់ ក្នុងនោះមានកុមារចំនួន​​៦១​នាក់បានស្លាប់ នៅតំបន់ហ្គាហ្សា​ និង​១០ នាក់ ក្នុងនោះមានកុមារ ២ នាក់ នៅអ៊ីស្រាអែល។

អ៊ីស្រាអែលនិយាយថា ភាគច្រើននៃអ្នកដែលត្រូវបានសម្លាប់នៅតំបន់ហ្គាហ្សា គឺជាពួកសកម្មប្រយុទ្ធ ហើយថាការស្លាប់របស់ជនស៊ីវិលណាមួយគឺដោយអចេតនា។ ប៉ុន្តែក្រុមហាម៉ាសដែលជាក្រុមសកម្មប្រយុទ្ធដែលគ្រប់គ្រងទឹកដីបានបដិសេធរឿងនេះ។

យោងតាមសេចក្តីថ្លែងការណ៍របស់សេតវិមាន លោក Biden បានលើកទឹកចិត្តអ៊ីស្រាអែលឱ្យខិតខំប្រឹងប្រែង ដើម្បីធានាការការពារជនស៊ីវិលស្លូតត្រង់។

សេចក្តីថ្លែងការណ៍នោះបានបន្ថែមថា«មេដឹកនាំទាំងពីរបានពិភាក្សាគ្នាពីវឌ្ឍនភាព នៅក្នុងប្រតិបត្តិការយោធារបស់អ៊ីស្រាអែល ប្រឆាំងនឹងក្រុមហាម៉ាស និងក្រុមភេរវករដទៃទៀត នៅតំបន់ហ្គាហ្សា»។

ប្រធានាធិបតី Biden បានសម្តែងការគាំទ្រចំពោះបទឈប់បាញ់គ្នា និងពិភាក្សាអំពីការចូលរួមរបស់សហរដ្ឋអាមេរិក ជាមួយអេហ្ស៊ីបនិងដៃគូដទៃទៀតឆ្ពោះទៅរកការបញ្ចប់ជម្លោះមួយនេះ។ អំពើហិង្សានេះបានធ្វើឲ្យមានការព្រួយបារម្ភជាអន្តរជាតិកាន់តែខ្លាំងឡើង។

មេដឹកនាំពិភពលោកនិងអង្គការមនុស្សធម៌ បានអំពាវនាវឱ្យមានវិធានការទប់ស្កាត់ពីការស្លាប់របស់ពលរដ្ឋ និងភាពវឹកវរដែលកើតឡើងដោយការបំផ្លាញអគារនិងហេដ្ឋារចនាសម្ព័ន្ធ។

សហរដ្ឋអាមេរិកបានរារាំងកិច្ចប្រឹងប្រែង នៅក្រុមប្រឹក្សាសន្តិសុខអង្គការសហប្រជាជាតិជាលើកទីបី ដើម្បីចេញសេចក្តីថ្លែងការណ៍មួយអំពាវនាវឱ្យអ៊ីស្រាអែលបញ្ឈប់ការវាយលុកផ្នែកយោធារបស់ខ្លួន ដោយសង្កត់ធ្ងន់ជំនួសកិច្ចប្រឹងប្រែងការទូតរបស់ខ្លួន។

អង្គការសហប្រជាជាតិ ក៏បានសម្តែងការព្រួយបារម្ភ អំពីការខូចខាតហេដ្ឋារចនាសម្ព័ន្ធ នៅក្នុងតំបន់ហ្គាហ្សាស្ទ្រីបដែលក្រីក្ររួចទៅហើយ ដែលជាកន្លែងមានប្រជាជន​២​លាននាក់។ សាលារៀនចំនួន ៤០ និងមន្ទីរពេទ្យចំនួន​៤ ត្រូវបាន« បំផ្លាញទាំងស្រុងឬដោយផ្នែក» នៅក្នុងប៉ុន្មានថ្ងៃថ្មីៗនេះ។ ​

​​គួរបញ្ជាក់ថា ការផ្ទុះឡើងនៃអំពើហិង្សាបានចាប់ផ្តើម បន្ទាប់ពីមានភាពតានតឹងរវាងអ៊ីស្រាអែលនិងប៉ាឡេស្ទីន ដែលបានកើនឡើងនៅក្នុងទីក្រុងហ្សេរុយសាឡឹមខាងកើត ដែលបានឈានដល់ការប៉ះទង្គិចគ្នានៅទីតាំងដ៏សក្ការៈមួយ ដែលគោរពបូជាដោយប្រជាជនម៉ូស្លីមនិងជ្វីហ្វ។ ក្រុមហាម៉ាស់ដែលគ្រប់គ្រងតំបន់ហ្គាហ្សាបានចាប់ផ្តើមបាញ់រ៉ុក្កែត​បន្ទាប់ពីបានព្រមានអ៊ីស្រាអែលឱ្យចាកចេញពីកន្លែងនោះ ដោយបង្កការវាយប្រហារតាមអាកាស៕ ប្រភព៖ BBC ប្រែសម្រួល៖ នង ណារិន