រាជធានីភ្នំពេញ ៖ ជនសង្ស័យ២ក្រុម ត្រូវសមត្ថកិច្ចឃាត់ខ្លួន ក្រោយបើកឆាកប្រយុទ្ធគ្នាដូចក្នុងរឿងហុងកុង ផ្អើលខ្លាំង នៅចំណុចលើដងផ្លូវរថភ្លើង ក្រុមទី១០៤ ភូមិ២២ សង្កាត់បឹងកក់ទី២ ខណ្ឌទួលគោក កាលពីថ្ងៃទី១៣ ខែឧសភា ឆ្នាំ២០២៥ វេលាម៉ោងប្រហែល១៦:០២នាទី។

លុះនៅថ្ងៃដដែលវេលាម៉ោង ១៩:១៥នាទីយប់ កម្លាំងផ្នែកជំនាញ នៃអធិការដ្ឋាននគរបាលខណ្ឌទួលគោក បានធ្វើការស្រាវជ្រាវឃាត់ខ្លួនជនសង្ស័យ០៤នាក់ ០២ក្រុម ជាបន្តបន្ទាប់ពីបទហិង្សាដោយចេតនាមានស្ថានទម្ងន់ទោស(ក្មេងទំនើង២ក្រុមប្រើដាវ,ពូថៅ,ដុំថ្មនិងដាវកែច្នៃកាប់និងគប់គ្នាទៅវិញទៅមកបណ្ដាលឲ្យរបួសទាំងសងខាង) ធ្វើការស្រាវជ្រាវឃាត់ខ្លួននៅចំណុច៣ទីតាំងផ្សេងគ្នា ។

ក្រុមទី១-ស្រាវជ្រាវឃាត់ខ្លួនជនសង្ស័យ០៣នាក់ ទី១-ឈ្មោះ ជ័យ ម៉ារ៉ាឌីភេទប្រុស អាយុ២៨ឆ្នាំ ជនជាតិខ្មែរ និងទី២-ឈ្មោះ ជ័យ ដារ៉ារ៉ាន់ ភេទប្រុស អាយុ២៣ឆ្នាំ ជនជាតិខ្មែរ ឃាត់ខ្លួននៅចំណុចបន្ទប់ពិគ្រោះជម្ងឺទូទៅវេជ្ជបណ្ឌិត ញឹម សុវណ្ណភ័ត្រាផ្លូវជាតិលេខ០៥ ក្រុមទី៧ ភូមិក សង្កាត់ច្រាំងចំរះ២ ខណ្ឌឬស្សីកែវ កាលពីវេលាម៉ោងប្រហែល១៩:០០នាទី នាថ្ងៃដដែល ។និងទី៣-ឃាត់ខ្លួនជនសង្ស័យឈ្មោះ ជ័យ ប៊ុនសាក់ ភេទប្រុស អាយុ២២ឆ្នាំ ជនជាតិខ្មែរ ឃាត់ខ្លួននៅចំណុចផ្ទះលេខA11 ផ្លូវបេតុង ក្រុមទី៨ ភូមិខ សង្កាត់ច្រាំងចំរះ២ ខណ្ឌឬស្សីកែវ រាជធានីភ្នំពេញ រួចបញ្ជូនមកកាន់អធិការដ្ឋាននគរបាលខណ្ឌទួលគោក ចាត់ការតាមនីតិវិធី ។

លុះមកដល់វេលាម៉ោងប្រហែល២២:៣០នាទី សមត្ថកិច្ចបានបន្តស្រាវជ្រាវជនសង្ស័យក្រុមទី២បានម្នាក់ ឈ្មោះ ចាន់ វាសនា ភេទប្រុស អាយុ៤២ឆ្នាំ ជនជាតិខ្មែ ឃាត់ខ្លួននៅចំណុចលើដងផ្លូវរថភ្លើង ក្រុមទី១០៤ ភូមិ២២ សង្កាត់បឹងកក់ទី២ ខណ្ឌទួលគោកដែលបានប្រព្រឹត្តបទល្មើស នៅចំណុចកើតហេតុខាងលើ ។

សមត្ថកិច្ចបានឲ្យដឹងថា ជនសង្ស័យក្រុមទី១មាន ៖

១-ឈ្មោះ ជ័យ ម៉ារ៉ាឌីភេទប្រុស អាយុ២៨ឆ្នាំ មុខរបរ បើកបររថយន្ត ស្នាក់នៅផ្ទះជួលមិនចាំលេខ ផ្លូវបេតុង សង្កាត់ច្រាំងចំរះ២ ខណ្ឌឬស្សីកែវ រាជធានីភ្នំពេញ របួសជាំដើមទ្រូង (ដោយសារក្រុមជនសង្ស័យឈ្មោះ ចាន់ វាសនា និងបក្ខពួកវាយនិងឈើជ្រុងនៅពេលកើតហេតុ) រួចហើយរត់គេចខ្លួបាត់។

២-ឈ្មោះ ជ័យ ដារ៉ារ៉ាន់ ភេទប្រុស អាយុ២៣ឆ្នាំ មុខរបរ កម្មករសំណង់ ស្នាក់នៅផ្ទះជួលមិនចាំលេខ ផ្លូវបេតុង សង្កាត់ច្រាំងចំរះ២ ខណ្ឌឬស្សីកែវ រាជធានីភ្នំពេញ របួសភ្លៅស្ដាំដេរ០៨ថ្នេរ (ដោយសារក្រុមជនសង្ស័យឈ្មោះ ចាន់ វាសនា និងបក្ខពួកកាប់និងកាំបិតនៅពេលកើតហេតុ) រួចហើយរត់គេចខ្លួបាត់។

៣-ឈ្មោះ ជ័យ ប៊ុនសាក់ ភេទប្រុស អាយុ២២ឆ្នាំ មុខរបរ កម្មករសំណង់ ស្នាក់នៅផ្ទះជួលមិនចាំលេខ ផ្លូវបេតុង សង្កាត់ច្រាំងចំរះ២ ខណ្ឌឬស្សីកែវ រាជធានីភ្នំពេញ ។ ដកហូត វត្ថុតាងចាប់យកមាន៖ ពូថៅដៃដងឈើចំនួន០១ (ចាប់យកពីឈ្មោះ ជ័យ ដារ៉ារ៉ាន់) និងម៉ូតូ០១គ្រឿងម៉ាក winnerx ស៊េរី2023 ពណ៍ក្រហម ភ្នំពេញ 1KV-0112 (ចាប់យកពីឈ្មោះ ជ័យ ម៉ារ៉ាឌី) ។

ជនសង្ស័យក្រុមទី២មាន ៖

១-ឈ្មោះ ចាន់ វាសនា ភេទប្រុស អាយុ៤២ឆ្នាំ ជនជាតិខ្មែរ មុខរបរ កម្មករសំណង់ ស្នាក់នៅផ្ទះជួលពុំចាំលេខ ផ្លូវរថភ្លើង សង្កាត់បឹងកក់ទី២ ខណ្ឌទួលគោក និងបក្ខពួកប្រហែល២៦នាក់នៅក្នុងភូមិ២២ ផ្លូវរថភ្លើង សង្កាត់បឹងកក់ទី២ (ក្រោយពេលធ្វើសកម្មភាពគេចខ្លួនបាត់) ។

ចំណែកជនរងគ្រោះ: ឈ្មោះ អ៊ិន ចាន់ធី ហៅ ធី ភេទប្រុសអាយុ៤០ឆ្នាំ មុខរបរ សន្តិសុខស្នាក់នៅផ្ទះលេខ១៥១ ផ្លូវរថភ្លើង ក្រុមទី១០៥ ភូមិ២២ សង្កាត់បឹងកក់ទី២ ខណ្ឌទួលគោក រាជធានីភ្នំពេញ របួសស្នាមក្បាល និងខ្នងដោយសារក្រុមជនសង្ស័យ០៣នាក់ ឈ្មោះ ជ័យ ម៉ារ៉ាឌី , ឈ្មោះ ជ័យ ដារ៉ារ៉ាន់ និងឈ្មោះ ជ័យ ប៊ុនសាក់ កាប់នៅពេលកើតហេតុ ) ។

ពិនិត្យទីកន្លែងកើតហេតុនិងចាប់យកវត្ថុតាងរួមមាន៖

១-ឈើជ្រុងចំនួន០១ មានប្រវែងប្រហែល៥តឹក ។

២-ញញួរសម្រាប់ដកដែកគោលចំនួន០១ (ចាប់យកនៅកន្លែងកើតហេតុ) ជារបស់បក្ខពួកជនសង្ស័យឈ្មោះ ចាន់ វាសនា ប្រើវាយនិងកាប់នៅពេលកើតហេតុរួចបោះចោលនៅកន្លែងកើតហេតុហើយរត់គេចខ្លួនបាត់ ។

បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរកសាងសុំណុំរឿងបញ្ជូនទៅកាន់អយ្យការអមសាលាដំបូងរាជធានីភ្នំពេញ ចាត់ការតាមច្បាប់ ៕