រាជធានីភ្នំពេញ ៖ រថយន្ត២គ្រឿង រួមទាំងរម៉កឃ្លុបដឹកអីវ៉ាន់ចំនួន២គ្រឿងទៀត បានរងការខូចខាតយ៉ាងដំណំ ពាសពេញផ្លូវ ខណៈកំពុងឈប់ស្តុប ត្រូវបានរថយន្តដឹកស៊ីម៉ង់ត៍មួយគ្រឿង បើកលឿនចាប់ហ្វ្រាំងមិនស៊ី បុកពេញទំហឹង កាលពីវេលាម៉ោង១១និង៤៥នាទី ថ្ងៃទី២៨ ខែឧសភា ឆ្នាំ២០២១ នៅចំណុចផ្លូវណតប្រ៊ីត ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។

តាមសម្តីរបស់ប្រជាពលរដ្ឋនៅទីតាំងកើតហេតុ បានប្រាប់ក្រុមការងារ TVFB ឲ្យដឹងថា មុនពេលកើតហេតុ គេឃើញ រថយន្តដឹកស៊ីម៉ង់ត៍មួយគ្រឿង ម៉ាកហ៊ីយ៉ាន់ដាយ បានបើកក្នុងល្បឿនលឿន ក្នុងទិសដៅពីជើងទៅត្បូង លុះដល់ចំណុចស្តុបណតប៊្រីជ ចាប់ហ្វ្រាំងមិនទាន់ ក៏ជ្រុលល្បឿនទៅបុករម៉កម៉ូតូឃ្លុបដឹកអីវ៉ាន់ ចំនួន២គ្រឿង រុញទៅបុកនឹងរថយន្តម៉ាក Ford Ranger ពណ៌ស និងរថយន្តម៉ាក KIA Mornnig ពណ៌ស បណ្ដាលឲ្យរងការខូចខាត យ៉ាងដំណំខូចខាតពេញផ្លូវតែម្តង និងបង្កការកកស្ទះផងដែរ ។

បន្ទាប់ពីកើតហេតុ សមត្ថកិច្ចជំនាញបានធ្វើការវាស់វែង ទុកឲ្យភាគីពាក់ព័ន្ធចចារដោះស្រាយគ្នា បញ្ចប់រឿងនៅទីតាំងកើតហេតុតែម្តង៕