ខេត្តកំពង់ចាម៖ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម និងជាប្រធានក្រុមការងារថ្នាក់ជាតិ ចុះមូលដ្ឋានស្រុកកោះសូទិនបានណែនាំដល់អាជ្ញាធរដែនដី មន្រ្តីគ្រប់ផ្នែក និងសមត្ថិកច្ចគ្រប់លំដាប់ថ្នាក់ ត្រូវរួមគ្នាទប់ស្កាត់ឱ្យបានការឆ្លងរីករាលដាល នៃជំងឺកូវីដ ១៩ ក្នុងមូលដ្ឋាន និងផ្សព្វផ្សាយបានទូលំទូលាយ ស្ដីពីវិធានការការពារ ឱ្យបានល្អ ដើម្បីកាត់បន្ថយការចម្លង។ ការណែនាំរបស់ឯកឧត្ដមរដ្ឋមន្រ្ដីនេះ ក្នុងឱកាសជួបប្រជុំពិនិត្យការងារ របស់ថ្នាក់ដឹកនាំ ក្រុមប្រឹក្សាស្រុក ឃុំ នៃស្រុកកោះសូទិន ខេត្តកំពង់ចាម នាព្រឹកថ្ងៃទី ២៨ ខែឧសភា ឆ្នាំ២០២១ ។
ឯកឧត្តម ខៀវ កាញារីទ្ធ បានលើកទឹកចិត្តដល់អាជ្ញាធរដែនដីគ្រប់លំដាប់ថ្នាក់ មន្រ្តីគ្រប់ផ្នែក ក៏ដូចជាក្រុមការងារទាំងអស់ ដែលបានចុះមកជួយការងារនៅក្នុងស្រុកកោះសូទិន ត្រូវបន្តរួមសហការសាមគ្គីគ្នា ឱ្យបានកាន់តែរឹងមាំថែមទៀត។ ឯកឧត្ដមរដ្ឋមន្រ្ដីក៏បានជំរុញដល់ថ្នាក់ដឹកនាំ ស្រុក ឃុំ ភូមិ ត្រូវមានស្មារតីសាមគ្គីភាពផ្ទៃក្នុងល្អ ផ្អែកលើយុត្តិធម៌ មានភាពស្មោះត្រង់ និងមានវិន័យក្នុងកិច្ចការងារ ទើបអាចរួមគ្នាបំពេញរាល់ភារកិច្ចទទួលបានជោគជ័យថ្មីៗបន្ថែមទៀតក្នុងការបម្រើដល់ប្រជាពលរដ្ឋ ស្រមតាមគោលការណ៍ និងផែនការសម្មភាពការងារ របស់ប្រមុខរាជរដ្ឋាភិបាលបានដាក់ចេញ ដើម្បីរួមគ្នា អនុវត្តន៍ឱ្យបានល្អ។
ជាមួយនេះដែរ ឯកឧត្ដមក៏បានស្នើដល់អាជ្ញាធរស្រុក ឃុំ ភូមិ ត្រូវបន្តសកម្មភាពការងារង្ការ និងទប់ស្កាត់ លុបបំបាត់បញ្ហាគ្រឿងញឿន និងល្បែងស៊ីសង ក្នុងមូលដ្ឋាន ភូមិ ឃុំ ដើម្បីរក្សាសុខសុវត្ថិភាពជូនដល់ បងប្អូន ប្រជាពលរដ្ឋ ។
បើតាមលោក យី វណ្ណៈ អភិបាល នៃគណៈអភិបាលស្រុក កោះសូទិន ខេត្តកំពង់ចាម បានធ្វើរបាយការណ៍បូកសរុបលទ្ធផលការងារ និងបានបង្ហាញពីសមិទ្ធផលថ្មីៗដែលក្រុមការងាររាជរដ្ឋាភិបាលចុះជួយស្រុកកោះសូទិន សម្រេចអនុវត្តន៍បានក្នុងរយៈពេលកន្លងមក រួមទាំងលើកិច្ចការស្ដារ កសាងនូវរាល់សមិទ្ធផលនានា បានជាច្រើន ដែលបម្រើដល់វិស័យពុទ្ធចក្រ និងអាណាចក្រ បានកាន់តែរីកចម្រើនជាបន្តបន្ទាប់។ លោកបានលើកឡើងថា ស្ថានភាព និងសភាពការណ៍ក្នុងការការពារទប់ស្កាត់ជំងឺកូវីដ-១៩ គឺស្រុកបានខិតខំផ្សព្វផ្សាយតាមការប្រជុំ តាមឃោសនសព្ទ័ តាមមូលដ្ឋាន ភូមិ ឃុំ អំពីវិធានការណ៍របស់រាជរដ្ឋាភិបាល និងក្រសួងសុខាភិបាល ពិសេស ការអនុវត្តន៍ ៣ កុំ ៣ ការពារ ។ ជាមួយគ្នានេះ នៅទូទាំងស្រុកកោះសូទិន មានមណ្ឌល ចត្តាឡីស័ក ១ កន្លែង គឺស្ថិតនៅសាលាពុទ្ធិកៈ វត្តដំណាក់ព្រីង។
លោកអភិបាលស្រុកបានបន្ថែមថា ក្នុងរយៈពេលកន្លងមកនេះ រកឃើញវិជ្ជមានជំងឺកូវីដ ចំនួន០៣នាក់ សុទ្ធតែនាំចូលពីក្រៅ ក្នុងនោះ ជាសះស្បើយ០២ នាក់ នៅសម្រាកព្យាបាល ០១ នាក់ ហើយ ប្រជាពលរដ្ឋប៉ះពាល់ដោយផ្ទាល់ចំនួន ៨ នាក់ និងប៉ះពាល់ដោយប្រយោលចំនួន ៣៦ នាក់ ។
ឯកឧត្តម ខៀវ កាញារីទ្ធ បានចាត់ទុកលទ្ធផលការងារ ដែលក្រុមការងារថ្នាក់ជាតិចុះជួយស្រុកកោះសូទិន អនុវត្តន៍បាននាពេលកន្លងមកនេះ គឺជាការបង្ហាញនូវកិច្ចខិតខំប្រឹងប្រែងរួមសហការគ្នា ធ្វើឱ្យសម្រេចបាននូវផែនការសម្មភាព ដែលបានដាក់ចេញ ជាពិសេសកិច្ចការងារមនុស្សធម៌ ជួយដល់ជនទីទាល់ក្រ ខ្វះខាត ដែលជួបការលំបាកក្នុងជីវភាពរស់នៅប្រចាំថ្ងៃ និងអ្នកជួបគ្រោះធម្មជាតិផ្សេងៗ រួមទាំងការចូលរួមកសាងសមិទ្ធផលនានាជា ច្រើនទៀតផងដែរ៕ ប្រភព៖ AKP
