រាជធានីភ្នំពេញ៖ យ៉ាងហោចណាស់ រថយន្តចំនួន៣គ្រឿង បានរងការខូចខាត ខណៈកំពុងបើកបរតាមដងផ្លូវ ត្រូវបានរថយន្ត បែនដឹកដីសង្ស័យដាច់ហ្វ្រាំង បុករះជាបន្តបន្ទាប់ បង្កការកកស្ទះចរាចរណ៍ផងដែរ កាលពីវេលាម៉ោង ៤ និង ៤៥នាទីល្ងាច ថ្ងៃទី២៨ ខែឧសភា ឆ្នាំ២០២១ នៅតាមបណ្តោយផ្លូវជាតិលេខ៣ ក្នុងសង្កាត់ពងទឹក ខណ្ឌដង្កោ រាជធានីភ្នំពេញ ។

បើយោងតាមប្រភពព័ត៌មានពីអ្នកបើកបររថយន្តរងគ្រោះ បានបញ្ជាក់ប្រាប់ក្រុមការងារ TVFB ថា មុនពេលកើតហេតុរថយន្តទាំងអស់ បានបើកបរ ទិសដៅពីត្បូងទៅជើង។ លុះមកដល់ចំណុចកើតហេតុ រថយន្តម៉ាកឡិចស៊ីស បើកបរដោយបុរសម្នាក់ បានធ្វើការបង្អន់ល្បឿន ដើម្បីឲ្យរថយន្តម៉ាកព្រុសឆ្លងកាត់ផ្លូវនៅខាងមុខ ស្រាប់តែមានរថយន្តបែនដឹកដីធុនធំមួយគ្រឿង សង្ស័យតែហ្វ្រាំងមិនស៊ី បានបួងចង្កូតគេចមិនផុត ក៏មកបុកពីក្រោយយ៉ាងពេញទំហឹង លើរថយន្តម៉ាកធុនត្រា ធ្វើឲ្យរថយន្តម៉ាកធុនត្រានោះ បន្តបុកពីក្រោយរថយន្តម៉ាកឡិចស៊ីស រួចរថយន្តឡិចស៊ីស បន្តទៅបុករថយន្តម៉ាកព្រុស ដែរឆ្លងកាត់ផ្លូវ បណ្ដាលឲ្យរងការខូចខាតយ៉ាងដំណ តែសំណាងល្អក្នុងករណីគ្រោះថ្នាក់ចរាចរណ៍ខាងលើ មិនបណ្ដាលឲ្យមានអ្នកណាម្នាក់រងរបួសឡើយ គ្រាន់តែរងការខូចខាតរថយន្តយ៉ាងដំណំនៅនឹងទីតាំងកន្លែងកើតហេតុខាងលើ ។

ក្រោយពេលកើតហេតុ សមត្ថកិច្ចនគរបាលប៉ុស្តិ៍រដ្ឋបាលពងទឹក បានសហការជាមួយនិងនគរបាលចរាចរណ៍ជំនាញខណ្ឌដង្កោ ចុះមកធ្វើការវាស់វែង បន្ទាប់មកក៏យករថយន្តទៅរក្សាទុកនៅអធិការរដ្ឋាននគរបាលខណ្ឌដង្កោ ដើម្បីដោះស្រាយគ្នា នៅពេលក្រោយតាមច្បាប់ ៕ អែល មេសា