រាជធានីភ្នំពេញ៖ បុរសម្នាក់ត្រូវបានបោកក្បាលស្លាប់ភ្លាមៗយ៉ាងរន្ធត់ ចំណែកម៉ូតូវិញបានខ្ទាតធ្លាក់ចេញពីលើផ្លូវចូលព្រៃ ខណៈកំពុងជិះម៉ូតូសុខៗ ស្រាប់តែមានរថយន្តម៉ាកកូរ៉េមួយគ្រឿហង បានដាច់កង់ក្រោយ រមៀលខ្ទាតមកបុកចំម៉ូតូជនរងគ្រោះដែលកំពុងជិះពេញទំហឹង ។

ហេតុការណ៍ដ៍រន្ធត់នេះបានកើតឡើងកាលពីវេលាម៉ោង ៦និង៣៥នាទី ព្រឹកថ្ងៃទី២៩ ខែឧសភា ឆ្នាំ២០២១ ចំណុចទល់មុខសាលារៀនពងទឹក លើផ្លូវជាតិលេខ៣ ក្នុងសង្កាត់ប្រទះឡាង ខណ្ឌកំបូល រាជធានីភ្នំពេញ។

តាមប្រភពព័ត៌មានបានបញ្ជាក់ប្រាប់ក្រុមការងារTVFBឲ្យដឹងថា ដំបូងឡើយគេឃើញរថយន្តកូរ៉េ មួយគ្រឿង ពណ៌ស ពាក់ស្លាកលេខ ភ្នំពេញ 2AS-0346 កំពុងបើកបរលើដងផ្លូវស្របទិសគ្នាសុខៗ ស្រាប់តែដាច់កង់ផ្នែកខាងក្រោយ រមៀលខ្ទាតមកបុកនឹងម៉ូតូម៉ាកហុងដាវ៉េវ ពណ៌ក្រហម ពាក់ស្លាកលេខ ព្រៃវែង 1I-5087 ដែលកំពុងជិះដោយជនរងគ្រោះឈ្មោះ បូ ចាន់នី អាយុ២៩ឆ្នាំ មុខរបរកម្មករសំណង់ ស្នាក់នៅបន្ទប់ជួលក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ចេញពីផ្ទះទៅធ្វើការ ជិះតាមបណ្តោយផ្លូវជាតិលេខ៣ ពីជើងទៅត្បូង បណ្តាលឲ្យដួលបោកក្បាលស្លាប់នឹងផ្លូវភ្លាមៗមួយរំពេច ។ចំណែកម៉ូតូវិញ បានប៉ើងខ្ទាតធ្លាក់ពីលើផ្លូវចូលព្រៃ ។

ក្រោយកើតហេតុ សមត្ថកិច្ចជំនាញចរាចរណ៍ បានចុះមកដល់កន្លែងកើតហេតុ វាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់ និងប្រគល់សពឲ្យសាច់ញាតិធ្វើបុណ្យតាមប្រពៃណី ៕ អែល មេសា