រាជធានីភ្នំពេញ៖ រថយន្តស៊េរីទំនើបម៉ាក BMW មួយគ្រឿង បានរងការខូចខាតផ្នែកខាងមុខយ៉ាងដំណំ ខណៈបើកទៅប៉ះជាមួយម៉ូតូស្កុបពី ជ្រុលមកបុកនឹងទ្រូងផ្លូវពេញទំហឹង បង្កការភ្ញាក់ផ្អើលកាលពីវេលាម៉ោង ១១និង៣៥នាទី ព្រឹកថ្ងៃទី១ ខែមិថុនា ឆ្នាំ២០២១ នៅចំណុចទល់មុខផ្សារដីហ៊ុយ តាមបណ្តោយផ្លូវហាណូយ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។

បើតាមប្រភពពីកន្លែងកើតហេតុ បានប្រាប់TVFB ឲ្យដឹងថា មុនពេលកើតហេតុ រថយន្តម៉ាក BMW ពណ៌ខ្មៅ ពាក់ស្លាកលេខ កម្ពុជា S.T 8586 បើកបរតាមបណ្តោយផ្លូវភ្នំពេញហាណូយ ពីជើងមកត្បូងក្នុងល្បឿនលឿន បានបុកប៉ះជាមួយម៉ូតូស្កុបពីមួយគ្រឿងរងការខូចខាត ទើបជ្រុលមកបុកនឹងទ្រូងផ្លូវពេញទំហឹងតែម្តង បណ្តាលឲ្យរងការខូចខាតរថយន្តយ៉ាងដំណំ ចំណែកទ្រូងផ្លូវមិនប៉ះពាល់ធ្ងន់ធ្ងរ សមត្ថកិច្ចចរាចរណ៍មូលដ្ឋានបានអនុញ្ញាតឲ្យហៅរថយន្តស្ទូច មកស្ទូចយកទៅជួសជុលខ្លួនឯង និងសងសំណងទៅឲ្យម្ចាស់ម៉ូតូចំនួន១០០ដុល្លារដើម្បីបញ្ចប់រឿងតែម្តង ៕