អន្តរជាតិ៖ សារព័ត៌មាន Channel News Asia បានចេញផ្សាយនៅព្រឹកថ្ងៃទី១៣ ខែកក្កដា ឆ្នាំ២០២១ បានឲ្យដឹងថា មន្ត្រីសុខាភិបាលនិងប៉ូលីសបាននិយាយនៅថ្ងៃច័ន្ទទី១២ ខែកក្កដាថា មនុស្សយ៉ាងហោចណាស់៥២ នាក់បានស្លាប់ និង២២នាក់ផ្សេងទៀតបានរងរបួស នៅក្នុងអគ្គិភ័យឆាបឆេះនៅមន្ទីរពេទ្យសម្រាប់ដាក់ព្យាបាលអ្នកជំងឺ កូវីដ-១៩ នៅភាគខាងត្បូងនៃប្រទេសអ៊ីរ៉ាក់។ នេះជាគ្រោះអគ្គិភ័យលើកទី២នៅប្រទេសអ៊ីរ៉ាក់ ក្នុងរយៈពេល៣ខែកន្លងមកនេះ។
អគ្គិភ័យបានឆាបឆេះនៅមន្ទីរពេទ្យAl-Hussein កាលពីល្ងាចថ្ងៃច័ន្ទ ហើយត្រូវបានគ្រប់គ្រង ដោយកងកម្លាំងការពារស៊ីវិលក្នុងស្រុក។
អ្នកនាំពាក្យអាជ្ញាធរសុខាភិបាលក្នុងតំបន់លោក Haydar al-Zamili បាននិយាយនៅព្រឹកថ្ងៃអង្គារនេះថា សាកសពចំនួន ៥២នាក់ត្រូវបានគេរកឃើញ និងមនុស្ស២២នាក់ផ្សេងទៀតបានរងរបួស នៅក្នុងចំនួនអ្នកស្លាប់ចុងក្រោយ បន្ទាប់ពីអគ្គិភ័យនេះបានឆាបឆេះអាគារដាក់អ្នកជំងឺកូវីដ-១៩។
លោកបាននិយាយថា«ជនរងគ្រោះបានស្លាប់ដោយសារការរលាក ហើយការស្រាវជ្រាវកំពុងបន្ត» ដោយកត់សម្គាល់ថា ដោយមានការភ័យខ្លាច អាចមានជនរងគ្រោះនៅជាប់នៅខាងក្នុងអាគារទៀតផងដែរ។
ការិយាល័យរបស់លោកបាននិយាយនៅក្នុងសេចក្តីថ្លែងការណ៍មួយថា ក្រុមអ្នកជួយសង្គ្រោះបានកំពុងបន្តប្រតិបត្តិការដើម្បីស្វែងរកសាកសពបន្ថែមទៀត ក្នុងនោះលោកនាយករដ្ឋមន្រ្តី Mustafa al-Kadhimi បានជួបប្រជុំជាបន្ទាន់ជាមួយរដ្ឋមន្រ្តីជាន់ខ្ពស់ និងបានបញ្ជាចាប់ខ្លួនអ្នកគ្រប់គ្រងផ្នែកសុខភាពនិងការពារស៊ីវិល នៅទីក្រុងNassiriya។ សេចក្តីថ្លែងការណ៍បានបន្ថែមថា អ្នកគ្រប់គ្រងមន្ទីរពេទ្យក៏ត្រូវបានបញ្ជាឱ្យចាប់ខ្លួនផងដែរ។
យោងតាមរបាយការណ៍បានឲ្យដឹងថា អគ្គិភ័យនេះអាចបណ្តាលមកពីការផ្ទុះស៊ីឡាំងអុកស៊ីសែន ប៉ុន្តែមូលហេតុផ្លូវការនៅតែត្រូវបានបញ្ជាក់ច្បាស់នៅឡើយនោះទេ។
នេះមិនមែនជាលើកទីមួយទេ ដែលមន្ទីរពេទ្យផ្ទុកអ្នកជំងឺកូវីដ១៩បានឆាបឆេះនៅប្រទេសអ៊ីរ៉ាក់ ដូចកាលពីដើមខែមេសាដែរ អគ្គិភ័យឆាបឆេះនៅមន្ទីរពេទ្យបាដាដ ផ្ទុកអ្នកជំងឺកូវីដ១៩ បានសម្លាប់មនុស្ស៨២ នាក់និងរបួស១១០នាក់។ មូលហេតុនៃការផ្ទុះនិងអគ្គិភ័យជាបន្តបន្ទាប់ ដោយសារតែគ្រប់គ្រងស៊ីឡាំងផ្ទុកអុកស៊ីសែន មិនបានត្រឹមត្រូវ។
គួរបញ្ជាក់ថា ប្រព័ន្ធសុខាភិបាលរបស់ប្រទេសអ៊ីរ៉ាក់ បាននឹងកំពុងតស៊ូដើម្បីដោះស្រាយវិបត្តិជំងឺកូវីដ១៩ ដែលបានសម្លាប់មនុស្សចំនួន១៧.៥៩២នាក់ និងឆ្លងជាង១,៤ លាននាក់៕
ប្រភព៖ Channel News Asia ប្រែសម្រួល៖ នង ណារិន
