ខេត្តកណ្តាល ៖ រថយន្តព្រូសមួយគ្រឿង បានបើកធ្លាក់កំពង់ដស្វាយតានី ចូលទឹកទន្លេតែម្តង ផ្អើលប្រជាពលរដ្ឋនាំគ្នាជួយទាញមនុស្សចេញ ចំណែករថយន្តវិញ នាំគ្នាដាក់ខ្សែទាញឡើងមកលើគោក ។
ហេតុការណ៍៍នេះ បានកើតឡើងកាលពីវេលាម៉ោង១០ព្រឹកថ្ងៃទី១៧ ខែមេសា ឆ្នាំ២០២៥ នៅត្រើយខាងកើត កំពង់ចម្លងស្វាយតានី ស្ថិតក្នុងភូមិពោធិ៍កណ្តាល ឃុំត្រើយស្លា ស្រុកស្អាង ខេត្តកណ្តាល ។
តាមប្រភពព័ត៌មានពីគ្រួសាររងគ្រោះ បានប្រាប់អោយដឹងថា មុនកើតហេតុ ពួកគាត់មានគោលបំណងបើកបររថយន្ត (Prius) មួយគ្រឿង ទៅលេងឪពុកម្តាយ នៅភូមិព្រែកសៅ ឃុំស្វាយប្រទាល ស្រុកស្អាង ខេត្តកណ្តាល។ មកដល់ចំណុចកំពង់ចម្លងស្វាយតានី ត្រើយខាងកើត ក៏បើកចុះដល់លើទូកដ ដើម្បីឆ្លងទូកដទៅត្រើយម្ខាងទៀត ក៏ស្រាប់តែជ្រុលហ្គែរ បណ្តាលអោយធ្លាក់ចូលទឹកទន្លេបាសាក់តែម្តង ត្រូវបានបងប្អូនប្រជាពលរដ្ឋនាំគ្នាជួយអ្នកនៅក្នុងរថយន្តចំនួន០៣នាក់ (ស្រី០១នាក់) ទាន់ពេលវេលា ។
ក្រោយកើតហេតុភ្លាមៗ គេក៏ឃើញវត្តមាន លោក សេង វុធ និងលោក អេង វណ្ណឌី អភិបាលរង នៃគណៈអភិបាលស្រុកស្អាង បានដឹកនាំកម្លាំងអាវុធហត្ថស្រុក កម្លាំងអធិការស្រុក ក្រុមប្រឹក្សាឃុំត្រើយស្លា កម្លាំងប៉ុស្តិ៍នគរបាលឃុំ លោកមេភូមិពោធិ៍កណ្តាល ម្ចាស់អាជីវកម្មកំពង់ចម្លងស្វាយតានី ចុះជួយសង្គ្រោះមនុស្សក្នុងរថយន្តព្រូសដែលបានធ្លាក់ចូលក្នុងទឹកទន្លេ ស្រង់យកឡើងមកលើគោកវិញ ដោយសុវត្ថិភាពនិងប្រគល់ជូនដល់ម្ចាស់រថយន្ត យកទៅជួសជុលខ្លួនឯង ៕
