រាជធានីភ្នំពេញ ៖ យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា នៅព្រឹកថ្ងៃទី១៩ ខែកក្កដា ឆ្នាំ២០២១នេះ អាជ្ញាធរជាតិប្រយុទ្ធប្រឆាំងគ្រឿងញៀន បានប្រារព្ធពិធីដុតបំផ្លាញនូវបរិមាណគ្រឿងញៀន សារធាតុគិមីផ្សំ និងសារធាតុពាក់ព័ន្ធផ្សេងៗទៀត សរុបមានចំនួនជាង ១០តោន ដើម្បីចូលរួមអបអរសាទរ «ទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា» នារាជធានីភ្នំពេញ ។
ពិធីស្ថិតក្រោមអធិបតីភាព ឯកឧត្តម ជួន សុវណ្ណ អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងមានការអញ្ជើញចូលរួមពី ឯកឧត្តម កៅ ខុនដារ៉ា រដ្ឋលេខាធិការក្រសួងមហាផ្ទៃ, ឯកឧត្តម នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន, ឯកឧត្តម ឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន នៃស្នងការដ្ឋាននគរបាលជាតិ និងមន្ត្រីថ្នាក់ដឹកនាំតំណាងក្រសួង ស្ថាប័នពាក់ព័ន្ធជាច្រើនរូប ព្រមទាំងមន្ត្រីតំណាងស្ថានទូតនានាប្រចាំកម្ពុជា ប្រធាន FBI អាមេរិកប្រចាំកម្ពុជា និងតំណាងការិយាល័យ UNODC ប្រចាំកម្ពុជា ។
ក្នុងចំណោមគ្រឿងញៀនជាង១០តោន ដែលត្រូវបំផ្លាញចោលក្នុងពិធីនេះ រួមមាន ៖
I-គ្រឿងញៀនដែលត្រូវបំផ្លាញដោយវិធីដុត ៖ សរុបចំនួន ៤.៣១១,៥១៣.៩៩(៤ត ៣១១គ.ក ៥១៣.៩៩ក) ។
II-គ្រឿងញៀនដែលត្រូវបំផ្លាញដោយវិធីបន្សាបនៅពេលក្រោយ ៖ សរុបចំនួន ៧.៥៥១,៥០៦.៩៩ (៧ត ៥៥១គ.ក ៥០៦.៩៩ក) ៕
