(ភ្នំពេញ)៖ ស្ថានទូតរបស់ប្រទេសកម្ពុជា ប្រចាំសហរដ្ឋអាមេរិក បានចេញសេចក្តីប្រកាសព័ត៌មាន ដោយអំពាវនាវដល់បងប្អូនប្រជាពលរដ្ឋខ្មែររស់នៅ និងសិក្សាក្នុងសហរដ្ឋអាមេរិកទាំងអស់ សូមប្រុងប្រយ័ត្នខ្ពស់បំផុត ចំពោះករណីអំពើហិង្សាកើតឡើងគួរឲ្យបារម្ភ លើពលរដ្ឋអាស៊ីរស់នៅអាមេរិក ដែលកំពុងកើតមានឡើង នៅក្នុងរដ្ឋមួយចំនួន។

ក្នុងសេចក្តីប្រកាសព័ត៌មាន របស់ស្ថានទូតខ្មែរនៅអាមេរិក បានបញ្ជាក់ថា ស្ថានទូតសូមអំពាវនាវដល់បងប្អូនទាំងអស់ ប្រកាន់យកការប្រុងប្រយ័ត្នខ្ពស់បំផុត ចំពោះករណីអំពើហិង្សាខាងលើ (អំពើហិង្សាមកលើពលរដ្ឋអាស៊ី និងពលរដ្ឋអាមេរិកដើមកំណើតអាស៊ី) ហើយក្នុងករណីទទួលរង ឬមើលឃើញហេតុការណ៍ហិង្សាណាមួយកើតឡើង សូមរាយការណ៍អំពីករណីនោះទៅប៉ូលិស ឬអាជ្ញាធរមូលដ្ឋាន។

សេចក្តីជូនដំណឹងខាងលើ បានបន្តថា ក្នុងករណីត្រូវការអន្តរាគមន៍របស់ស្ថានទូត សូមទាក់ទងតាមរយៈទូរស័ព្ទលេខ ២០២ ៧២៦៧៧៤២ ឬ ២០២ ៩៩៧ ៧០៣១ ឬអ៉ីម៉ែល consular.camemb.usa.gmail.com ស្ថានទូតនឹងខិតខំរួមចំណែកដោះស្រាយតាមគ្រប់លទ្ធភាព៕ប្រភព៖ ផេក ក្រសួងព័ត៍មាន