រាជធានីភ្នំពេញ ៖ បុរសម្នាក់ បើករថយន្តព្រូសមួយគ្រឿង បានបុកជាមួយនឹងរម៉កដឹកបន្លែមួយគ្រឿង បណ្ដាលឲ្យយុវជនម្នាក់ បោកក្បាល ស្លាប់ភ្លាមៗ យ៉ាងរន្ធត់នៅនឹងកន្លែងកើតហេតុតែម្តង បង្កការភ្ញាក់ផ្អើលកាលពីវេលាម៉ោង ៣ទៀបភ្លឺ ថ្ងៃទី៤ ខែវិច្ឆិកា ឆ្នាំ២០២១ នៅតាមបណ្ដោយផ្លូវ២២១ ក្នុងសង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ។
ប្រភពព័ត៌មានពីសមត្ថកិច្ចបានឱ្យដឹងថា មុនពេលកើតហេតុ បុរសម្នាក់បានបើករថយន្តម៉ាកព្រុសមួយគ្រឿង ដែលពាក់ស្លាកលេខ ភ្នំពេញ 2BN-7592 ធ្វើដំណើរតាមបណ្ដោយផ្លូវ ១៣៨ ក៏បានមកដល់ចំណុចកើតហេតុ បានបុកគ្នាជាមួយនឹងរម៉កដឹកបន្លែ ពេញមួយទំហឹង បណ្ដាលឲ្យយុវជនម្នាក់ ដែលមានវ័យប្រហែល ២០ឆ្នាំ ដែលជាអ្នកបើករម៉កដឹកបន្លែនោះ ស្លាប់បាត់បង់ជីវិតភ្លាមៗនៅនឹងកន្លែងកើតហេតុតែម្តង ។
ក្រោយពីកើតហេតុ សមត្ថកិច្ចជំនាញចរាចរណ៍របស់អធិការដ្ឋាននគរបាលខណ្ឌទួលគោក បានធ្វើការទំនាក់ទំនងឲ្យសមត្ថកិច្ចជំនាញចរាចរណ៍របស់ស្នងការដ្ឋាននគរបាលរាជធានីភ្នំពេញ ធ្វើការឃាត់ម្ចាស់រថយន្ត និងស្ទូចយករថយន្តនិងម៉ូតូសណ្ដោងរ៉ឺម៉ក យកទៅទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយគ្នាតាមផ្លូវច្បាប់ បន្តទៀត និងប្រគល់សពឲ្យសាច់ញាតិធ្វើបុណ្យតាមប្រពៃណី ៕ Mrr Ka
