ក្រុងព្រះសីហនុ ៖ ករណីគ្រោះថ្នាក់ចរាចរណ៍មួយបានកើតឡើង និងបង្កការភ្ញាក់ផ្អើលយ៉ាងខ្លាំង ដោយម៉ូតូ២គ្រឿងបុកប៉ះគ្នា និងបណ្តាលឲ្យមនុស្ស៤នាក់រងរបួសធ្ងន់និងស្រាល កាលពីវេលាម៉ោងជាង៧យប់ ថ្ងៃទី០៤ ខែធ្នូ ឆ្នាំ២០២១នេះ តាមបណ្តោយវិថីឯករាជ្យ ចំណុចទល់មុខសាលាកម្មករ ស្ថិតក្នុងភូមិ៤ សង្កាត់៤ ក្រុង/ខេត្តព្រះសីហនុ ។

ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេប្រទះឃើញម៉ូតូមួយគ្រឿង ម៉ាកClick ពណ៌ខ្មៅ ពាក់ស្លាកលេខ សៀមរាប 1AK-3460 ជិះគ្នា២នាក់ បើកបរក្នុងទិសដៅពីរង្វង់មូលតោ២ ឆ្ពោះទៅស្តុប៣៣ លុះមកដល់ចំណុចកើតហេតុក៏បានបត់ឆ្វេងដៃ ស្រាប់តែមានម៉ូតូមួយគ្រឿង ម៉ាក អាឆ្លាម ពណ៌ខ្មៅគ្មានស្លាកលេខ បើកបរបញ្ច្រាសទិសគ្នា បណ្តាលឲ្យបុកគ្នាពេញទំហឹង និងមនុស្ស៤នាក់រងរបួសធ្ងន់និងស្រាល រីឯម៉ូតូទាំង២គ្រឿងរងការខូចខាតយ៉ាងដំណំ ។

បច្ចុប្បន្ន ជនរងគ្រោះត្រូវបានបញ្ជូនយកទៅសង្គ្រោះបន្ទាន់នៅមន្ទីរពេទ្យ ។ ដោយឡែកវត្ថុតាងទាំង២គ្រឿង ត្រូវបាននគរបាលចរាចរណ៍ផ្លូវគោកខេត្តព្រះសីហនុ លើកយកទៅរក្សាទុក នៅការិយាល័យនគរបាលចរាចរណ៍ផ្លូវគោកខេត្តព្រះសីហនុ ដើម្បីរងចាំធ្វើការដោះស្រាយបន្តតាមក្រោយ ៕ សំណាង