រាជធានីភ្នំពេញ​​​ ៖ បុរសវ័យចំណាស់ម្នាក់ ជិះកង់ដឹកទុយោតាមដងផ្លូវ ត្រូវបានរថយន្តបែនដឹកដី បើកបុកពីក្រោយពេញទំហឹង បណ្ដាលឲ្យស្លាប់មួយរំពេចយ៉ាងរន្ធត់ កាលពីវេលាម៉ោង៩និង២០នាទី ព្រឹកថ្ងៃទី៥ ខែធ្នូ ឆ្នាំ២០២១ នៅតាមបណ្ដោយផ្លូវ២១៧ សង្កាត់ដង្កោ ខណ្ឌដង្កោ រាជធានីភ្នំពេញ។

សមត្ថកិច្ចបានឲ្យដឹងថា សពជនរងគ្រោះឈ្មោះ ម៉ៅ ទីន អាយុ៦២ឆ្នាំ មុខរបរយាមឃ្លាំង ស្នាក់នៅភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ។

ប្រភពព័ត៌មានពីសមត្ថកិច្ច បានបញ្ជាក់ប្រាប់ក្រុមការងារTVFB បានឲ្យដឹងថា មុនពេលកើតហេតុ គេបានឃើញបុរសវ័យចំណាស់ម្នាក់ ជិះកង់ដឹកទុយោ ធ្វើដំណើរតាមបណ្តោយផ្លូវ២១៧ ក្នុងទិសដៅពីជើងទៅត្បូង ខណៈមកដល់ត្រង់ចំណុចកើតហេតុ ស្របពេលក៏មានរថយន្តបែនមួយគ្រឿង ម៉ាកNISSAN ពណ៌ខៀវ ពាក់ស្លាកលេខ ចង្កូតស្ដាំ PP-1288 បើកបរដោយបុរសម្នាក់ ធ្វើដំណើរស្របគ្នាល្បឿនលឿន មកពីក្រោយជ្រុលទៅបុកជាមួយនឹងកង់ជិះ ដែលជិះដោយជនរងគ្រោះពេញទំហឹង បណ្ដាលឲ្យស្លាប់ភ្លាមៗមួយរំពេចយ៉ាងរន្ធត់នៅនឹងកន្លែងកើតហេតុ។ ចំណែកកង់វិញ គាបជាប់ក្រោមរថយន្តអូសប្រហែលជា៤០ម៉ែត្រទើបឈប់ ហើយភ្លាមៗ អ្នកបើកបរ បានបើកទ្វាររថយន្តចុះរត់គេចខ្លួនបាត់ ។

ក្រោយកើតហេតុ សមត្ថកិច្ចមូលដ្ឋានបានចុះមកដល់ទីតាំងកន្លែងកើតហេតុ ធ្វើការទំនាក់ទំនងទៅសមត្ថកិច្ចជំនាញការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែង យករថយន្តនិងកង់ ទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់ និងប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី ៕ មេសា