រាជធានីភ្នំពេញ​ ៖ បុរសម្នាក់បើករថយន្តឡិចស៊ីសRX300 មួយគ្រឿងហោះបុកចូលកន្លែងរក្សាទុករថយន្តដឹកដី បណ្ដាលឲ្យរងរបួសយ៉ាងធ្ងន់ធ្ងរ និងខ្ទេចរថយន្តស្ទើរទាំងស្រុង កាលពីវេលាម៉ោង១២យប់ ឈានចូលថ្ងៃទី៦ ខែធ្នូ ឆ្នាំ២០២១ នៅចំណុចតាមបណ្តោយផ្លូវវិមានឈ្នះៗ ក្នុងសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។

ប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា មុនពេលកើតហេតុ គេបានឃើញបុរសម្នាក់ បានបើករថយន្តម៉ាក Lexus 300 មួយគ្រឿង ពណ៌ស គ្មានស្លាកលេខ បានធ្វើដំណើរតាមបណ្ដោយផ្លូវខាងលើ លុះមកដល់ចំណុចកើតហេតុផ្លូវបំបែកជា៣ បានបើកលឿនដូចហោះ ទៅបុកនឹងរថយន្តដឹកដី ដែលចតចោលនៅចិញ្ចើមផ្លូវ បណ្ដាលឲ្យអ្នកបើករថយន្ត Lexus 300 រងរបួសធ្ងន់ ត្រូវបានក្រុមគ្រូពេទ្យបញ្ជូនទៅមន្ទីរពេទ្យភ្លាមៗ រីឯរថយន្តវិញ រងការខូចខាតយ៉ាងដំណំ។

ក្រោយពេលកើតហេតុសមត្ថកិច្ចមូលដ្ឋាន ក៏បានមកដល់បានទំនាក់ទំនង ឱ្យសមត្ថកិច្ចជំនាញចរាចរណ៍របស់អធិការដ្ឋាននគរបាលខណ្ឌព្រែកព្នៅ ឲ្យភាគីទាំងសងខាង ចរចារគ្នានៅទីតាំងចំណុចកើតហេតុ ដោយខាងតំណាងនិងម្ចាស់រថយន្តឡិចស៊ីស យល់ព្រមសងទៅម្ចាស់រថយន្តដឹកដីទាំង៣គ្រឿង ដើម្បីបញ្ចប់រឿងនៅទីតាំងចំណុចកើតហេតុតែម្តង ៕ Mrr Tra