ខេត្តក្រចេះ ៖ សមត្ថកិច្ចបានប្រទះឃើញសាកសពបុរសម្នាក់ មានវ័យប្រមាណ២០ឆ្នាំជាង ត្រូវបានឃាតក សម្លាប់នៅចំណុចព្រៃខាងក្រោយភូមិមួយកន្លែង រហូតរលួយស្អុយទៅហើយ បង្កការភ្ញាក់ផ្អើលកាលពីព្រឹកថ្ងៃទី៤ ខែធ្នូ ឆ្នាំ២០២១ នៅចំណុចភូមិព្រែកចំឡាក់ ឃុំកញ្ជរ ស្រុកឆ្លូង ខេត្តក្រចេះ។ នេះបើយោងតាមផេក ស្នងការដ្ឋាននគរបាលខេត្តក្រចេះ ។
សមត្ថកិច្ចបានឲ្យដឹងថា ការស្លាប់របស់បុរសខាងលើនេះ គឺជា អំពើឃាតកម្ម ដោយសាកសពជនរងគ្រោះមាន ឈ្មោះ អ៊ិន វាសនា អាយុ២៦ឆ្នាំ រស់នៅភូមិ ឃុំកើតហេតុខាងលើ។
ក្នុងនោះ បើតាមការពិនិត្យជុំវិញទីតាំងកើតហេតុ សមត្ថកិច្ចបានប្រទះឃើញម៉ូតូម៉ាក វ៉េ វ អាល់ ហ្វា ស៊េរី ឆ្នាំ ២០១៧ ពណ៌ ខ្មៅ មួយ គ្រឿង គ្មាន ស្លាក លេខ បន្សល់ទុកចោលក្នុងព្រៃ ចម្ងាយ ពី ម៉ូតូ ប្រហែល ២០
ម៉ែត្រ ខណៈសាកសពត្រូវបានកំណត់ថា អាចស្លាប់មានរយៈពេលជាច្រើនថ្ងៃមកហើយ។
ទោះបីជាយ៉ាងណា ជុំវិញករណីនេះ នគរបាលជំនាញព្រហ្មទណ្ឌបានកំណត់ថា ជាអំពើឃាតកម្ម ដែលបង្កឡើងដោយជនមិនស្គាល់មុខ ហើយពេលនេះ នគរបាលជំនាញស្រុក និងខេត្ត កំពុងតែបើកការស៊ើបអង្កេតស្រាវជ្រាវរកមុខជនដៃដល់ ដើម្បីយកមកផ្តន្ទាទោសតាមច្បាប់ ៕
