ខេត្តក្រចេះ ៖ ជនសង្ស័យម្នាក់ ត្រូវបានសមត្ថកិច្ចធ្វើការចាប់ឃាត់ខ្លួន ក្រោយបានធ្វើសកម្មភាព គាស់ទម្លុះទម្លាយ លួចរបស់របរគ្រឿងអលង្ការលុយកាក់ពីផ្ទះរបស់ជនរងគ្រោះ កាលពីយប់ថ្ងៃទី ៥ ខែធ្នូ ឆ្នាំ២០២១ នៅចំណុច ភូមិក្រញូងសែនជ័យ ឃុំក្រញូងសែនជ័យ ស្រុកស្នួល ខេត្តក្រចេះ ។ នេះបើយោងតាមផេក ស្នងការដ្ឋាននគរបាលខេត្តក្រចេះ។

សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនបាននេះមានឈ្មោះ វ៉ុន សៀងហុង អាយុ១៨ឆ្នាំ ស់នៅភូមិនៀល ឃុំព្រៃស្លឹក ស្រុកត្រាំង ខេត្តតាកែវ ជាមុខសញ្ញាធ្លាប់ជាប់ពន្ធនាគារ ពាក់ព័ន្ធនិងអំពើលួច តែនៅមិនរាងចាល ហើយក៏ត្រូវបាននគរបាលស្រុកស្នួល តាមស្រាវជ្រាវចាប់ខ្លួនម្តងទៀត បន្ទាប់ពីបានគាស់ទម្លុះទម្លាយ លួចរបស់របរគ្រឿងអលង្ការលុយកាក់ ពីផ្ទះរបស់ជនរងគ្រោះ លួចយកគ្រឿងអលង្ការ និងលុយកាក់មួយចំនួនរួមមាន៖

-លុយខ្មែរ២៨៣៥០០០រៀល។

-ខ្សែជើងផ្លាកទីនចំនួន០២ខ្សែរ ទម្ងន់០៣ជី ០៧ហ៊ុន០៥លី។

-ខ្សែរដៃផ្លាកទីនចំនួន០១ខ្សែរទម្ងន់៤០០លី។

-ចិញ្ចៀន០១វង់ ទម្ងន់១០៨លី ។

បច្ចុប្បន្នជនសង្ស័យខាងលើ ត្រូវបានសមត្ថកិច្ចធ្វើការសាកសួរ និងកសាងសំណុំរឿងបញ្ជូនខ្លួនទៅកាន់តុលាការ ដើម្បីចាត់ការតាមច្បាប់បន្តទៀត៕