រាជធានីភ្នំពេញ ៖ បុរសម្នាក់ បើកបររថយន្តស្ទូច ជាន់ហ្វ្រាំងមិនស៊ីជ្រុលបុករះ រថយន្ត កង់បីណ្ឌា និងម៉ូតូជាច្រើនគ្រឿងទាន់អស់ល្បឿន ទៅបុកផ្ទប់នឹងកន្លែងលក់ដូររបស់បងប្អូនប្រជាពលរដ្ឋ រងការខូចខាតយ៉ាងដំណំ បណ្តាលឲ្យមនុស្ស៣នាក់របួសស្រាល កាលពីវេលាម៉ោង៣និង២០ នាទីរសៀលថ្ងៃទី០៩ ខែធ្នូ ឆ្នាំ ២០២១ នៅតាមបណ្ដោយផ្លូវ២៧១ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។

ប្រភពព័ត៌មានពីសមត្ថកិច្ចបានបញ្ជាក់ប្រាប់ក្រុមការងារ TVFB ឲ្យដឹងថា មុនពេលកើតហេតុ គេបានឃើញរថយន្តស្ទូចមួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3E-8168 បើកបរដោយបុរសម្នាក់ រួមដំណើរជាមួយនិងព្រូម្នាក់ទៀត ធ្វើដំណើរតាមបណ្ដោយផ្លូវ ២៧១ ក្នុងទិសដៅពីត្បូងទៅជើង ខណៈមកដល់ត្រង់ចំណុចកើតហេតុ ស្រាប់តែជាន់ហ្វ្រាំងមិនស៊ី ក៏បួងចង្កូតទៅបុករះរថយន្តឃ្លប់ដឹកទំនិញមួយគ្រឿង បន្តបុកកង់បីឥណ្ឌាមួយគ្រឿង និងម៉ូតូ៣គ្រឿងទៀត ។ ពេលនោះរថយន្តមិនទាន់អស់ល្បឿន ជ្រុលទៅបុកផ្ទប់នឹងរបងផ្ទះប្រជាពលរដ្ឋកល់ជាប់ទៅមុខលែងរួច សំណាងណាស់ក្នុងហេតុការណ៍គ្រោះថ្នាក់ចរាចរណ៍ខាងលើនេះ គ្រាន់តែបណ្ដាលឲ្យមនុស្ស៣នាក់រងរបួសរលាត់ដៃជើងបន្តិចបន្តួច។

ក្រោយមកកម្លាំងសមត្ថកិច្ចមូលដ្ឋាន បានចុះមកកន្លែងកើតហេតុ សហការជាមួយសមត្ថកិច្ចជំនាញវាស់វែង យករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំធ្វើការដោះស្រាយគ្នានៅពេលក្រោយបន្តទៀត៕មេសា