រាជធានីភ្នំពេញ ៖ ផ្ទះប្រជាពលរដ្ឋចំនួន១៧ខ្នងផ្ទះ ត្រូវបានអគ្គិភ័យឆេះខ្ទេចអស់ទាំងស្រុង យ៉ាងសន្ធោសន្ធៅ កាលពីវេលាម៉ោង ៨ និង១៥នាទីព្រឹក ថ្ងៃទី១០ ខែធ្នូ ឆ្នាំ២០២១នៅចំណុចសំណង់មិនរៀបរយផ្លូវជាតិលេខ៥ ក្រុមទី០៥ ភូមិ៣ សង្កាត់ច្រាំងចំរេះទី១ ខណ្ឌឫស្សីកែវ រាជធានីភ្នំពេញ បន្ទាប់ពីអគ្គិភ័យដែលឆេះនៅខណ្ឌដូនពេញ បំផ្លាញផ្ទះ៨០ខ្នង ទើបតែរលត់ មិនទាន់បានប៉ុន្មានផង បែរជាឆេះទីតាំងនេះ បន្តបន្ទាប់ ។ នេះបើយោងតាមផេក នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ ។

សមត្ថកិច្ចបានឲ្យដឹងថា ម្ចាស់ទីតាំងឈ្មោះ លី ភឿង ភេទ ស្រី អាយុ ៧០ ឆាំ្ន មុខរបរ: នៅផ្ទះ បានឆ្លងចរន្តអគិ្គសនី ឆេះផ្ទះប្រភេទសំណង់ ឈើប្រក់សង្ក័សី (សំណង់មិនរៀបរាយ) ខូចខាតផ្ទះទំហំ ០៤x០៥ ម៉ែត្រ ចំនួន ១២ខ្នង និង ផ្ទះទំហំ ០៧x១៤ ម៉ែត្រ ចំនួន ០៥ខ្នង សរុប១៧ខ្នងផ្ទះ តែគ្មានអ្នករបួសឡើយ ។

ក្នុងប្រតិបត្តិការបាញ់ពន្លត់នេះដែរ សមត្ថកិច្ចបានប្រើប្រាស់ រថយន្តការិយា ល័យ អគ្គិភ័យ ចំនួន ២៣ គ្រឿង ប្រើប្រាស់ទឹកអស់ ២៣រថយន្ត ស្មើរនឹង ៩២ម៉ែត្រគូប និងមានរថយន្តជំនួយអន្តរាគមន៍ រួមមាន៖

- រថយន្តក្រសួងមហាផៃ្ទចំនួន ០៤ គ្រឿង ប្រើប្រាស់ទឹកអស់ ០២ឡាន សើ្មនឹង ០៨ម៉ែត្រគូប ។

- អូប័រការិយាល័យចរាចរណ៍ផ្លូវទឹកចំនួន ០២ គ្រឿង ។

- រថយន្តសាលាខណ្ឌឫស្សីកែវចំនួន ០១ គ្រឿង ប្រើប្រាស់ទឹកអស់ ០១ រថយន្ត សើ្មនឹង ០៤ម៉ែត្រគូប ។

- ម៉ាសុីនបូមទឹកសាលាសង្កាត់ច្រាំងចំរេះទី០២ ចំនួន ០១គ្រឿង ។

- រថយន្តOCICទីក្រុងជ្រោយចង្វារចំនួន ០៦ គ្រឿង ប្រើប្រាស់ទឹកអស់ ០៣ រថយន្ត សើ្មនឹង ១២ម៉ែត្រគូប ។

- រថយន្តក្រុមហ៊ុនស្រាបៀរGanzbergចំនួន ០១ គ្រឿង ប្រើប្រាស់ទឹកអស់ ០២ រថយន្ត សើ្មនឹង ០៨ម៉ែត្រគូប ។

រហូតរលត់ទៅវិញ នៅវេលា ម៉ោង ០៩និង៤៥ព្រឹក ថ្ងៃខែឆ្នាំដដែល ៕