រាជធានីភ្នំពេញ ៖ បុរសម្នាក់បើករថយន្ដតាកូម៉ាមួយគ្រឿង បានជ្រុលទៅបុកនឹងឃឿនសួនច្បារចែកទ្រូងផ្លូវ បន្តបុកបង្គោលភ្លើង បន្ថែមរងការខូចខាតរថយន្តយ៉ាងដំណំ សំណាងណាស់គ្មានអ្នករបួស បង្កការភ្ញាក់ផ្អើលកាលពីវេលាម៉ោង១០ យប់ ថ្ងៃទី១០ ខែធ្នូ ឆ្នាំ២០២១ នៅតាមបណ្តោយផ្លូវជាតិលេខ៥ ក្នុងសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។

ប្រភពព័ត៌មានពីបងប្អូនប្រជាពលរដ្ឋបានអោយដឹងថា មុនពេលកើតហេតុ គេបានឃើញរថយន្ដ តាកូម៉ា មួយគ្រឿង ដែលពាក់ស្លាកលេខ ភ្នំពេញ 2Q-8761 បើកតាមបណ្ដោយផ្លូវលេខ ៥ លុះដល់ចំណុចកើតហេតុ ស្រាប់តែរេចង្កូត មកបុកសួនច្បារចែកផ្លូវ និងបង្គោលភ្លើង បណ្ដាលអោយរថយន្ដក្រឡាប់ជាច្រើនជុំ រងការខូចខាតយ៉ាងដំណំតែម្តង សំណាងណាស់គ្មាននរណាម្នាក់ រងរបួសនោះទេ ។

ក្រោយពេលកើតហេតុ សមត្ថកិច្ចក៏បានមកដល់ ស្ទូចរថយន្ដតាកូម៉ានោះ ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់បន្តទៀត ៕ Mrr Ka