ខេត្តស្វាយរៀង ៖ ជនសង្ស័យម្នាក់ បានបើករថយន្ត ទៅលួចយកម៉ូតូរបស់ប្រជាពលរដ្ឋ ត្រូវបានសមត្ថកិច្ចនៃអធិការដ្ឋាននគរបាលស្រុកចន្ទ្រា ក្រោមការដឹកនាំ និង បញ្ជាផ្ទាល់ ពីលោកវរសេនីយ៍ទោ ជិន សុភឿន អធិការនគរបាលស្រុក ធ្វើការចាប់ឃាត់ខ្លួនបានកាលពីវេលាម៉ោង៣និង៤៥នាទី ទៀបភ្លឺ ថ្ងៃទី៩ ខែធ្នូ ឆ្នាំ២០២១ ។ នេះបើយោងតាមផេក អធិការដ្ឋាននគរបាលស្រុកចន្ទ្រា ។
សមត្ថកិច្ចបានឲ្យដឹងថា ជនសង្ស័យដែលជាមុខសញ្ញាលួចយ៉ាងសកម្ម នេះត្រូវបាន កម្លាំងជំនាញនគរបាលព្រហ្មទណ្ឌស្រុកចន្រ្ទា ដឹកនាំដោយលោកវរសេនីយ៍ត្រី រាជ វីរៈ អធិការរងទទួលការងារព្រហ្មទណ្ឌ សហការ ជាមួយកម្លាំងប៉ុស្តិ៍នគរបាលរដ្ឋបាលព្រៃគគីរ និង ប៉ុស្តិ៍នគរបាលរដ្ឋបាលច្រេស ឃាត់ខ្លួនបានមានឈ្មោះ ពៅ វណ្ណ: ភេទប្រុស អាយុ២៧ឆ្នាំ មុខរបរមិនពិតប្រាកដ មានទីលំនៅភូមិស្វាយ សង្កាត់ចេក ក្រុងស្វាយរៀង ខេត្តស្វាយរៀង ។
នៅពេលឃាត់ខ្លួននោះសមត្ថកិច្ច ដកហូតបានរថយន្តមួយគ្រឿងម៉ាក KIA MORNING ហើយឆែកឆេរនៅក្នុងរថយន្តឃើញមានសម្ភារ:មួយចំនួនរួមមាន៖
-កន្ត្រៃកាត់ដែកពណ៌ខៀវ ចំនួន០១
-កូនសោធ្វើម៉ូតូ តូច ធំចំនួន០៦
-សោរម៉ូតូចំនួន០១
-អត្តសញ្ញាណប័ណ្ណ០១
-កាត់គ្រី០១
-ប័ណ្ណបេីកបរ០១
-ប័ណ្ណចាក់សាំង០១
-ប័ណ្ណបង់ពន្ធ០១
-ឯកសារទិញលក់រថយន្ត និង ម៉ូតូចំនួន០២សន្លឹក ។
បច្ចុប្បន្នជនសង្ស័យខាងលើ រួមនិងសម្ភារ: ត្រូវបានបញ្ជូនទៅសាលាដំបូងខេត្តស្វាយរៀង ដើម្បីចាត់ការបន្ត៕
