0រាជធានីភ្នំពេញ ៖ ពិធីករល្បីឈ្មោះដែលស្គាល់ថា ឈ្មោះ តាប៊ុយ បានជួបគ្រោះថ្នាក់ចរាចរណ៍ ដោយបើករថយន្ត Range Rover ទៅបុកគូទរថយន្តព្រុសដែលគេដែលកំពុងឈប់ស្តុប BKC បណ្តាលឲ្យរងការខូចខាត កាលពីវេលាម៉ោង ១ រំលងអាធ្រាត្រ ឈានចូលថ្ងៃទី ១៤ ខែធ្នូ ឆ្នាំ ២០២១ នៅក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

បើតាមសម្តីរបស់ម្ចាស់រថយន្តព្រុស ពាក់ស្លាកលេខ ភ្នំពេញ 2AH-7048 បានអោយដឹងដែរថា គាត់បានបើករថយន្ត មកឈប់ស្តុប ស្រាប់តែពេលនោះ ក៏មានរថយន្ត Range Rover ពណ៌ស ពាក់ស្លាកលេខ ភ្នំពេញ 2BK- 8809 ទំនើបមួយគ្រឿង បើកបរដោយបុរសម្នាក់ដែលគេស្គាល់ឈ្មោះ ថា តាប៊ុយ ដែលជាពិធីករល្បីឈ្មោះមួយរូប បានបើក រថយន្តមកបុកគូទរថយន្តរបស់គាត់ មួយទំហឹង បណ្ដាលឲ្យខូចខាត ផ្នែកខាងក្រោយ ហើយពេលនោះគាត់ក៏បានចុះ មកនិយាយគ្នា និងចង់លើកទូរសព្ទមកថតរថយន្តដើម្បីទុកជាឯកសារ ស្រាប់តែបុរសដែលគេស្គាល់ឈ្មោះតាប៊ុយ នោះ ក៏បានបើករថយន្ត គេចចេញពីកន្លែងកើតហេតុ ហើយគាត់ក៏បើកដេញ តាមរហូតមកដល់ចំណុចផ្លូវសហព័ន្ធរុស្ស៊ី ក៏កាក់បានតែម្តង ។

ជុំវិញករណីនេះ ក្រុមការងារ TVFB បានព្យាយាម សាកសួរទៅកាន់អ្នកបើកបររថយន្ត Range Rover ដែលគេស្គាល់ឈ្មោះថា តាប៊ុយ តែលោកមិនបានផ្ដល់ព័ត៌មានឲ្យយើង ជុំវិញករណីគ្រោះថ្នាក់ចរាចរណ៍នោះទេ។

ភ្លាម ៗសមត្ថកិច្ច បានចុះអន្តរាគមន៍ ដូចជាសាកសួរទៅភាគីរថយន្តដែលជួបគ្រោះថ្នាក់ចរាចរណ៍ខាងលើ ក្នុងការដោះស្រាយគ្នា ហើយគេក៏បានឃើញ បុរស២នាក់ក៏បានមកគ្រាលោកតាប៊ុយចេញពីកន្លែងកើតហេតុ ដោយសារតែលោកតាប៊ុយ មានសភាពដើរ ទទ្រេតទទ្រោត ទៅហើយ ។

ប៉ុន្តែទោះបីជាយ៉ាង នៅកន្លែងកើតហេតុ សមត្ថកិច្ចបានឲ្យដឹងថា សម្រាប់ម្ចាស់រថយន្តទាំង២បាន និយាយថា ស្អែកនឹងធ្វើការដោះស្រាយជាមួយគ្នាផងដែរ ៕