រាជធានីភ្នំពេញ​ ៖ ករណីគ្រោះថ្នាក់ចរាចរណ៍មួយបានកើតឡើង រវាងរថយន្ត៣គ្រឿង បានបុកបន្តកន្ទុយគ្នា បណ្តាលឲ្យរងការខូចខាតយ៉ាងដំណំ នៅតាមបណ្តោយផ្លូវព្រះនរោត្តម ជិតស្ពានអាកាសក្បាលថ្នល់ សង្កាត់ទន្លេបាសាក់ ខណ្ឌចំការមន រាជធានីភ្នំពេញ វេលាម៉ោងជាង១០ព្រឹក ថ្ងៃទី១៤ ខែធ្នូ ឆ្នាំ២០២១នេះ ។

ប្រភពព័ត៌មានពីសមត្ថកិច្ចបានបញ្ជាក់ប្រាប់ក្រុមការងារTVFB ឲ្យដឹងថា មុនពេលកើតហេតុ គេឃើញរថយន្តទាំង៣គ្រឿង បានធ្វើដំណើរស្របគ្នា តាមបណ្តោយផ្លូព្រះនរោត្តម ដោយរថយន្តម៉ាកហាយឡែនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ 2BB-0164 បើកបរដោយបុរសម្នាក់ ទិសដៅពីត្បូងមកជើង មកដល់ចំណុចកើតហេតុក៏បានបុកយ៉ាងពេញទំហឹង ពីក្រោយរថយន្តម៉ាកព្រុសពាក់ស្លាកលេខ ភ្នំពេញ 2BE-4065 ដែលធ្វើដំណើរនៅពីមុខ រួចរថយន្តព្រុសមិនទាន់អស់ល្បឿន ក៏បន្តទៅបុករថយន្តស៊េរីទំនើបមួយគ្រឿងទៀត រងការខូចខាតយ៉ាងដំណំ តែសំណាងល្អមិនបណ្តាលឲ្យមានអ្នកណារងរបួសទ្បើយ។

ក្រោយពីកើតហេតុ សមត្ថមូលដ្ឋានប៉ុស្តិ៍រដ្ឋបាលសង្កាត់ទន្លេបាសាក់ បានចូលទៅទីតាំងកន្លែងកើតហេតុ បានធ្វើការវាស់វែងយករថយន្តទាំង ៣គ្រឿងដាក់អែបគៀន និងបានឲ្យភាគីទាំងអស់ ចរចាគ្នាដើម្បីបញ្ចប់រឿងនៅទីតាំងកន្លែងកើតហេតុ៕មេសា