រាជធានីភ្នំពេញ ៖ មានការភ្ញាក់ផ្អើលទាំងព្រឹកមួយបានកើតឡើង ខណៈបុរសជនបរទេសម្នាក់ បានលោតសម្លាប់ខ្លួនពីលើផ្ទះ ស្រាប់តែធ្លាក់ចូលមកក្នុងបរិវេណខុនដូរមួយកន្លែង ដែលនៅជាប់គ្នា ស្លាប់នៅនឹងកន្លែង ផ្អើលសមត្ថកិច្ច ចុះធ្វើការហ៊ុព័ទ្ធខ្សែពិនិត្យ កាលពីវេលាម៉ោង៧ និង១៥នាទីព្រឹក ថ្ងៃទី១៤ ខែធ្នូ ឆ្នាំ២០២១ នៅចំណុចហាងអាហារដ្ឋានTHEDECK លេខ៦៨AB បន្ទប់K លេខ១+២ ជាន់ឡៅតឿ ផ្លូវ១៣៥ ក្រុម២២ ភូមិ៤ សង្កាត់ទួលទំពូងទី១ ខណ្ឌចំការមន រាជធានីភ្នំពេញ ។

ប្រភពព័ត៌មានពីសមត្ថកិច្ចបានប្រាប់អោយដឹងថា ជនរងគ្រោះមានឈ្មោះ ចន ស្ទិវិន (JOHN STEPHEN) ភេទប្រុស អាយុ៦០ឆ្នាំ ជនជាតិ NEW ZEALAND មុខរបរទេសចរ បានលោតពីលើផ្ទះជាន់ទី២ ខ្ទាតធ្លាក់ចូលក្នុងរបងអឹកផាតមិន ភូមិរុងរឿង ដែលមានទីតាំងនៅអាគារលេខ៦៦ ជាប់នឹងទីតាំងកើតហេតុខាងលើ បណ្តាលឲ្យស្លាប់បាត់បង់ជីវិត។

ភ្លាមៗ កម្លាំងនគរបាលខណ្ឌចំការមន សហការជាមួយនិងកម្លាំងជំនាញកោសល្យវិច្ច័យ របស់ស្នងការនគរបាលរាជធានីភ្នំពេញ ចុះធ្វើការត្រួតពិនិត្យ ឃើញថា ជនរងគ្រោះបានធ្វើអត្តឃាតដោយខ្លួនឯង និងដឹកសពយកទៅតម្កល់ទុកនៅវត្តទឹកថ្លា ដើម្បីរង់ចាំក្រុមគ្រួសារនិងសាច់ញាតិមកយកធ្វើបុណ្យទៅតាមប្រពៃណី៕ មេសា