រាជធានីភ្នំពេញ ៖ ជនជាតិបរទេស ម្នាក់ បានបើករថយន្ដព្រូសបានទៅបុករថយន្ដ Ford បណ្ដាលអោយរងការខូចខាតយ៉ាងដំណំ កាលពីវេលាម៉ោង ១០យប់ ថ្ងៃទី១៤ ខែធ្នូ ឆ្នាំ២០២១ ស្ថិតនៅតាមបណ្ដោយផ្លូវ ព្រះនរោត្ដម ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។

ប្រភពព័ត៌មានពីម្ចាស់រថយន្ដ Ford ស៊េរីទំនើបមួយគ្រឿង ដែលពាក់ស្លាកលេខ ភ្នំពេញ 2BP-9229 បានឲ្យដឹងថា មុនពេលកើតហេតុ គាត់បានធ្វើដំណើរតាមបណ្ដោយផ្លូវ ១១០ ក្នុងទិសដៅពី កើតមកលិច ក៏មកដល់ចំណុចកើតហេតុ ផ្លូវបំបែកជាបួន ឆ្លងកាត់ស្ពាននាគ ក៏មានរថយន្ដព្រូសមួយគ្រឿងទៀត ដែលពាក់ស្លាក់លេខ ភ្នំពេញ 2BA-4658 បើកដោយជនជាតិបរទេសក្នុងទិសដៅពីត្បូងទៅជើង បានជ្រុលមកបុករថយន្ត Ford របស់គាត់ពេញមួយទំហឹង បណ្ដាលឲ្យរងការខូចខាតយ៉ាងដំណំ តែម្តងសំណាងណាស់ គ្មាននរណាម្នាក់រងរបួសនោះទេ។

ក្រោយពេលកើតហេតុ សមត្ថកិច្ចជំនាញចរាចរណ៍របស់អធិការដ្ឋាននគរបាលខណ្ឌដូនពេញ បានមកដល់ទីតាំងកើតហេតុ ធ្វើការស្ទូចយករថយន្តទាំង២គ្រឿង នៅរក្សាទុកនៅអធិការដ្ឋាននគរបាលខណ្ឌដូនពេញ ដើម្បីរង់ចាំការដោះស្រាយគ្នានៅពេលក្រោយតាមច្បាប់បន្តទៀត៕ Mrr Ka