រាជធានីភ្នំពេញ ៖ រថយន្ដកុងតឺន័រមួយគ្រឿង បើកដោយបុរសម្នាក់ មិនប្រយ័ត្ន បានបុកខឿនពុះចែកផ្លូវ បន្ដទៅបុកនឹងស្លាកប៉ាណូ និងបង្គោលភ្លើង បណ្ដាលអោយរថយន្ដរងការខូចខាតយ៉ាងដំណំ កាលពីវេលាម៉ោង៨យប់ ថ្ងៃទី១៦ ខែធ្នូ ឆ្នាំ២០២១ នៅតាមបណ្ដោយផ្លូវវេងស្រេង ក្នុងសង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។

ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ គេបានឃើញបុរសម្នាក់ បានជិះរថយន្តកុងតឺន័រ ដែលពាក់ស្លាកលេខ ភ្នំពេញ 3D-5521 ធ្វើដំណើរតាមបណ្ដោយផ្លូវវេងស្រេង មកដល់ចំណុចផ្លូវកោង ក៏បានរេចង្កូតទៅបុកនឹងខឿនថ្មពុះចែកទ្រូងផ្លូវ បន្តទៅបុកបង្គោលភ្លើង និងស្លាកប៉ាណូ បណ្តាលឲ្យរងការខូចខាតយ៉ាងដំណំ តែសំណាងល្អគ្មានអ្នកណារងរបួសនោះទេ។

ក្រោយពេលកើតហេតុសមត្ថកិច្ចជំនាញចរាចរណ៍របស់អធិការនគរបាលខណ្ឌពោធិ៍សែនជ័យ បានទំនាក់ទំនងឲ្យសមត្ថកិច្ចជំនាញចរាចរណ៍របស់ស្នងការដ្ឋាននគរបាលរាជធានីភ្នំពេញ ធ្វើការស្ទូចរថយន្តយកទៅរក្សាទុកនៅស្នងការចរាចរណ៍ផ្លូវគោកដើម្បីរង់ចាំម្ចាស់ចូលមកដោះស្រាយតាមផ្លូវច្បាប់ ៕ Mrr Tra