រាជធានីភ្នំពេញ ៖ បុរសម្នាក់បើករថយន្ដមួយគ្រឿង បានគេចពីរបាំងថ្មពុះចែកផ្លូវ ក៏បានទៅបុករះត្រូវរថយន្ដដែលចតចោល បន្ដទៅបុកជញ្ជាំងផ្ទះបងប្អូនប្រជាពលរដ្ឋបណ្ដាលអោយរងការខូចខាត សំណាងរងរបួសស្រាល បង្កការភ្ញាក់ផ្អើល នៅតាមបណ្ដោយផ្លូវ ៥៩៨ដែលស្ថិតនៅក្នុងសង្កាត់ ភ្នំពេញថ្មី ខណ្ឌសែន សុខ រាជធានីភ្នំពេញ នាវេលាម៉ោង ១២យប់ ឈានចូលថ្ងែទី១៨ ខែធ្នូ ឆ្នាំ២០២១នេះ។

ប្រភពព័ត៌មានពីបងប្អូនប្រជាពលរដ្ឋបានឲ្យដឹងថាមុនពេលកើតហេតុ គេបានឃើញរថយន្តមួយគ្រឿង ម៉ាកស្តារិច ដែលពាក់ស្លាកលេខ ភ្នំពេញ 2W-2405 ធ្វើដំណើរហើយចេញពីផ្លូវ ១៩៨៦ បត់ឡើងមកផ្លូវ ៥៩៨ ក៏គេចនឹងរបាំងថ្មពុះចែកទ្រូងផ្លូវ បណ្តាលឲ្យបុករះត្រូវរថយន្តព្រូសមួយគ្រឿង ដែលពាក់ស្លាកលេខ ភ្នំពេញ 2AH-2687ចតចោលចិញ្ចើមផ្លូវ បណ្ដាលឲ្យរងការខូចខាត ។

ប្រភបដែលបន្តថា ភ្លាមនោះ រថយន្តមិនទាន់អស់ល្បឿនក៏បានទៅបុករះចូលជញ្ជាំងផ្ទះរបស់ប្រជាពលរដ្ឋបណ្ដាលឲ្យរងការខូចខាតយ៉ាងដំណំ សំណាងល្អគ្មានអ្នកណាម្នាក់រងរបួសធ្ងន់ទេ គ្រាន់តែរបួសស្រាល តែប៉ុណ្ណោះ ។

ក្រោយពេលកើតហេតុ សមត្ថកិច្ចជំនាញចរាចរណ៍របស់អធិការដ្ឋាននគរបាលខណ្ឌសែនសុខ បានធ្វើការយករថយន្ដទាំង២គ្រឿង យកទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីរង់ចាំភាគីទាំងសងខាងដោះស្រាយគ្នានៅពេលក្រោយ តាមច្បាប់បន្តទៀត៕ Mrr Tra