ខេត្តព្រះសីហនុ ៖ គ្រោះថ្នាក់ចរាចរណ៍មួយ បានកើតឡើង តាមបណ្ដោយដងផ្លូវវិថីឯករាជ្យ ដោយបុរសម្នាក់ បើករថយន្តក្នុងល្បឿនលឿន ហើយស្រែកថាចោរៗ បង្កការភ្ញាក់ផ្អើល លុះដល់ម្ដុំរង្វង់មូលត្រីដូហ្វីន ជ្រុលចង្កូតបុកប៉ះចំហៀងរថយន្តស៊េរីទំនើប ពេញទំហឹង បណ្ដាលឲ្យរងការខូចខាតស្ទើរតែទាំងស្រុង កាលពីវេលាម៉ោង ៨និង៥៥ នាទីយប់ថ្ងៃទី១៧ ខែធ្នូ ឆ្នាំ២០២១ នៅតាមបណ្ដោយផ្លូវវិថីឯករាជ្យ ក្បែរហ្នឹងសាលារៀនអនុវិទ្យាល័យសម្ដេចឪ ក្នុងភូមិ ០៣ សង្កាត់លេខ ០៣ ក្រុងព្រះសីហនុ ខេត្តព្រះសីហនុ។

ប្រភពពីកន្លែងកើតហេតុ បានប្រាប់ក្រុមការងារTVFB ឲ្យដឹងថា មុនពេលកើតហេតុ បានឃើញរថយន្តម៉ាក Highlander មួយគ្រឿង ពណ៌ ស ពាក់ស្លាកលេខ ភ្នំពេញ 2AN-8545 បើកបរដោយបុរសម្នាក់ បើកបរក្នុងទិសដៅពីកើតទៅលិច ហើយស្រែកថាចោរៗ ខណៈដែលមកដល់ម្ដុំរង្វង់មូលត្រីដូហ្វីន ក៏រេចង្កូតទៅបុកប៉ះជាមួយនឹងរថយន្តមួយគ្រឿងស៊េរីទំនើប ដែលមានទិសដៅផ្ទុយគ្នា ម៉ាក Mercedes ពាក់ស្លាកលេខ ភ្នំពេញ 2U-5786 បើកបរដោយបុរសម្នាក់ជាជនជាតិចិន បានបុកចំផ្នែកខាងក្រោយនៃរថយន្តខាងឆ្វេង បណ្ដាលឲ្យដាច់កង់តែម្ដង ។ ចំណែកឯរថយន្តបង្កដោយនៅសល់ចំហាយនៃល្បឿនលឿននោះ បានអូសទៅចម្ងាយជិត ១០០ ម៉ែត្រ ទៅឈប់ និងរងការខូចខាតផ្នែកខាងមុខខាងឆ្វេងយ៉ាងដំណំ តែមិនបណ្តាលឲ្យមានអ្នករងរបួសនោះទេ។

សមត្ថកិច្ចបានបញ្ជាក់ថា ករណីគ្រោះថ្នាក់ចរាចរណ៍ខាងលើនេះ មិនទាន់ដឹងដើមហេតុនៅឡើយទេ សមត្ថកិច្ចកំពុងស្រាវជ្រាវបន្ត និងវាស់វែង យករថយន្តទាំង២គ្រឿង ទៅរក្សាទុកនៅការិយាល័យចរាចរណ៍ ដើម្បីរង់ចាំសាកសួរនឹងដោះស្រាយតាមនីតិវិធីផ្លូវច្បាប់ ៕ សំណាង