ខេត្តក្រចេះ ៖ ជនសង្ស័យម្នាក់ ធ្វើសកម្មភាពលួចកាច់សោកម៉ូតូរបស់បងប្អូនប្រជាពលរដ្ឋ ត្រូវបាននគរបាលស្រុកចិត្របុរី ធ្វើការចាប់ឃាត់ខ្លួន កាលពីថ្ងៃទី២០ ខែធ្នូ ឆ្នាំ២០២១ នៅចំណុចអូរជ្រៅ ភូមិល្អ ឃុំចង្ក្រង់ ស្រុកចិត្របុរី ខេត្តក្រចេះ ។ នេះបើយោងតាមផេក ស្នងការដ្ឋាននគរបាលខេត្តក្រចេះ។

សមត្ថកិច្ចបានឲ្យដឹងថា ជនសង្ស័យមានឈ្មោះ ធួន ថាន់ អាយុ២៩ឆ្នាំ មុខរបរមិនពិតប្រាកដ មានទីលំនៅភូមិអូរខ្លូត ឃុំត្រមូង ស្រុកមេមត់ ខេត្តត្បូងឃ្មុំ ខណៈ បក្ខពួកចំនួន២នាក់ទៀត (ពុំស្គាល់អត្តសញ្ញាណ) រត់គេចខ្លួនបាត់។

ជាមួយនឹងការចាប់ខ្លួនជនសង្ស័យនេះដែរ សមត្ថកិច្ចបានធ្វើការដកហូតបានម៉ូតូ២គ្រឿង ក្នុងនោះមាន១គ្រឿងជាម៉ូតូរបស់ជនរងគ្រោះ និង១គ្រឿងទៀតជាម៉ូតូដែលជាមធ្យោបាយរបស់ពួកគេសម្រាប់ជិះធ្វើសកម្មភាពល្មើស។

បច្ចុប្បន្នជនសង្ស័យខាងលើ ត្រូវបានសមត្ថកិច្ចកសាងសំណុំរឿង ដើម្បីចាត់ការបន្តតាមនីតិវិធីច្បាប់ ៕