ខេត្តព្រះសីហនុ ៖ រថយន្តចំនួន ៤គ្រឿង បានបុកគ្នាបន្តបន្ទាប់ ពេញទំហឹង ខ្ទេចក្បាលមុខមើលលែងយល់ និងបានបណ្តាលឲ្យមនុស្សយ៉ាងហោចណាស់ចំនួន ៣នាក់ បានរងរបួសធ្ងន់ស្រាល ត្រូវបានបញ្ជូនទៅកាន់មន្ទីរពេទ្យ កាលពីវេលាម៉ោង ១១និង ១០នាទីព្រឹក ថ្ងៃទី២១ ខែធ្នូ ឆ្នាំ២០២១ នៅចំណុចផ្លូវជាតិលេខ៤ ចន្លោះបង្គោលគីឡូម៉ែតលេខ១៣២-១៣៣ ស្ថិតនៅភូមិសម្តេចតា ឃុំចំការហ្លួង ស្រុកកំពង់សីលា ខេត្តព្រះសីហនុ ។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ កើតឡើង រវាង រថយន្ត១គ្រឿងម៉ាក INTERNATIONAL ពណ៌សលាយលឿងនិងបៃតង ពាក់ស្លាកលេខ ភ្នំពេញ3C-8325 សណ្តោងរឺម៉កដឹកប្រេង ពាក់ស្លាកលេខ ភ្នំពេញ4A-3008 ដែលមានអ្នកបើកបរឈ្មោះ សុះ វុទ្ធា ភេទប្រុស អាយុ៣៣ឆ្នាំ រស់នៅភូមិស្រះព្រីង ឃុំបាធាយ ស្រុកបាធាយ ខេត្តកំពង់ចាម មុខរបរបើកបររថយន្ត បានបើកក្នុងទិសដៅពីព្រះសីហនុ ឆ្ពោះទៅភ្នំពេញ លុះមកដល់ចំណុចកើតហេតុ បានបុកគូថរថយន្ត១គ្រឿងម៉ាក LEXUS RX300 ពណ៌ស ពាក់ស្លាកលេខ ភ្នំពេញ2AH-1214 អ្នកបើកបរឈ្មោះ រី ឌីវ៉ែន ភេទប្រុស អាយុ៤០ឆ្នាំ មុខរបររត់តាក់ស៊ី ក្នុងទិសដៅស្របគ្នា ហើយក៏ចូលទៅបុករថយន្ត១គ្រឿងទៀតម៉ាកFUSO ពណ៌ត្រេអ៊ី ពាក់ស្លាកលេខ ខ.ម02 4.1462 សណ្តោងរឺម៉កក្នុងទិសដៅផ្ទុយគ្នា បើកបរដោយឈ្មោះជឹម ប៊ុនថា ភេទប្រុស អាយុ៣៤ឆ្នាំ មុខរបរអ្នកបើកបរ មានទីលំនៅភូមិព្រៃស្តុក ឃុំមហាសាំង ស្រុកភ្នំស្រួច ខេត្តកំពង់ស្ពឺ ហើយក៏មានរថយន្ត១គ្រឿងទៀតម៉ាក LEXUS470 ពណ៌ទឹកមាស ពាក់ស្លាកលេខ ភ្នំពេញ 2L -7521 បើកបរដោយឈ្មោះអុំ ម៉ន ភេទប្រុស អាយុ៤៦ឆ្នាំ មានទីលំនៅភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ ចូលទៅបុកពីក្រោយរថយន្តFUSO ក្នុងទិសដៅស្របគ្នានោះបន្ថែមទៀត សរុបទាំងអស់៤គ្រឿង បានរងការខូចខាតយ៉ាងដំណំ និងបណ្តាលឲ្យមានមនុស្សរហូតដល់ ៣នាក់ រងរបួសធ្ងន់ស្រាល ត្រូវបានបញ្ជូនទៅកាន់មណ្ឌលសុខភាពស្រុក។

ចំណែកវត្ថុតាង រថយន្តទាំង៤គ្រឿង ត្រូវបានផ្នែកជំនាញយកទៅរក្សាទុកនៅអធិការដ្ឋាននគរបាលស្រុក ដើម្បីរង់ចាំដោះស្រាយគ្នាតាមច្បាប់បន្តទៀត ៕