ខេត្តកំពង់ធំ ៖ ផ្ទះប្រជាពលរដ្ឋមួយខ្នង ត្រូវបានអគ្គិភ័យឆាបឆេះអស់គ្មានសល់ ត្រឹមមួយប៉ប្រិចភ្នែកប៉ុណ្ណោះ បង្កការភ្ញាក់ផ្អើលដល់បងប្អូនប្រជាពលរដ្ឋ និងសមត្ថកិច្ច ចុះមកអន្តរាគមន៍ កាលពីវេលាម៉ោង ៨ និង ៤៣នាទី យប់ ថ្ងៃទី ២៥ ខែធ្នូ ឆ្នាំ២០២១ នៅភូមិតាអោង ឃុំចើងដើង ស្រុកបារាយណ៍ ខេត្ត កំពង់ ធំ ។ នេះបើយោងតាមផេក នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ ។

សមត្ថកិច្ចបានឲ្យដឹងថាផ្ទះដែលត្រូវ អគ្គិភ័យឆេះបំផ្លាញនេះ គឺមួយខ្នង ទំហំ ៥x៧ម៉ែត្រ ធ្វើអំពីឈើ ដំបូលប្រក់ស័ង្កសីជញ្ជាំងក្ដា របស់ឈ្មោះ ឡុង វេង ភេទ ប្រុស អាយុ ៥៨ ឆ្នាំ រស់នៅភូមិ.ឃុំ កើតហេតុខាងលើ ខ្ទេចអស់ទាំងស្រុង ឆេះបំផ្លាញកង់ចំនួន ០២ គ្រឿង, ទូរទស្សន៍ ចំនួន ០១ គ្រឿង , កង្ហារចំនួន ០២ គ្រឿង, លុយចំនួន ១០ ម៉ឺនរៀល ផងដែរ ។

ចំណែកមូលហេតុសមត្ថកិច្ចបញ្ជាក់ឲ្យដឹងថា បណ្តាល មក ពី ឆ្លងចរន្ដអគ្គិសនី ហើយភ្លាមៗនោះ រថយន្តពន្លត់អគ្គិភ័យរបស់អធិការដ្ឋាននគរបាលស្រុកបារាយណ៍បានចេញជួយអន្តរាគមន៍ចំនួន០១គ្រឿង ប៉ុន្តែមិនបានប្រើប្រាស់ទឹកទេ ដោយសារផ្លូវតូចចង្អៀតរថយន្ដចូលទៅមិនរួច ៕