រាជធានីភ្នំពេញ ៖ ខ្ទេចពេញផ្លូវតែម្តង ខណៈរថយន្តម៉ាក Ford Ranger មួយគ្រឿង ត្រូវបានប្រជាពលរដ្ឋលើកឡើងថា បើកលឿនដូចហោះ បានមកបុកពីក្រោយម៉ូតូម៉ាក PCX កំពុងជិះឌុបគ្នា២នាក់ប្តីប្រពន្ធ ប៉ើងទៅបុកជាមួយរថយន្តព្រុស មួយគ្រឿងទៀតស្រុញរួញចូលគ្នា ខ្ទេចតែម្តង បណ្តាលឲ្យជនរងគ្រោះ២នាក់ប្តីប្រពន្ធនោះរបួសធ្ងន់ មិនតែប៉ុណ្ណោះ ភ្លាមៗរថយន្តនោះ មិនទាន់អស់ល្បឿននោះទេ បានជ្រុលទៅបុកផ្ទប់នឹងរបងការ៉ាស់សាំងមួយកន្លែង រងការខូចខាតជាច្រើនផ្ទាំង កល់ជាប់ទៅមុខលែងរួចតែម្តង បង្កការភ្ញាក់ផ្អើលកាលពីវេលាម៉ោងជិត១២យប់ ថ្ងៃទី២៦ ខែធ្នូ ឆ្នាំ ២០២១ នៅចំណុចផ្លូវ ភ្នំពេញហាណូយ ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ។

ប្រភពព័ត៌មានពីបងប្អូនប្រជាពលរដ្ឋនៅទីតាំងកើតហេតុ បានឲ្យដឹងថា មុនពេលកើតហេតុ គេបានឃើញ រថយន្តមួយគ្រឿងម៉ាក Ford Ranger ពណ៌ស ពាក់ស្លាកលេខ ភ្នំពេញ 2BB-9444 បើកបរដោយនារីម្នាក់ រួមដំណើរជាមួយនឹងបុរសម្នាក់ទៀត ក្នុងល្បឿនលឿន លុះដល់ចំណុចកើតហេតុ ស្រាប់តែមកបុកពីក្រោយម៉ូតូ PCX ពណ៌ស ពាក់ស្លាកលេខ ភ្នំពេញ 1HL-4604 ដែលកំពុងជិះដោយបុរសម្នាក់ ឌុបប្រពន្ធពីក្រោយ ក្នុងទិសដៅស្របគ្នាទិសពីលិចមកកើត ពេញទំហឹងបណ្តាលឲ្យអ្នកទាំង២របួសធ្ងន់ រុញប៉ើងម៉ូតូទៅបុកផ្ទប់នឹង រថយន្តព្រូស ពណ៌ស ពាក់ស្លាកលេខ ភ្នំពេញ 2BB-5241 បន្ថែមទៀត បណ្តាលឲ្យរងការខូចខាតយ៉ាងដំណំតែម្តង ។ មិនតែប៉ុណ្ណោះ ភ្លាមៗរថយន្តបង្កនោះ មិនទាន់អស់ល្បឿននោះទេ បានជ្រុលទៅបុកផ្ទប់នឹងរបងការ៉ាស់សាំងមួយកន្លែង រងការខូចខាតជាច្រើនផ្ទាំង កល់ជាប់ទៅមុខលែងរួច។ រីឯអ្នកបើកបររថយន្តបង្ក នោះក៏ត្រូវបានសមត្ថកិច្ចឃាត់ខ្លួនបានភ្លាមៗផងដែរ។

ក្រោយកើតហេតុ សមត្ថកិច្ចនគរបាលចរាចរណ៍មូលដ្ឋាន សហការជាមួយនគរបាលចរាចរណ៍ក្រុង ចុះមកធ្វើការវាស់វែង យករថយន្តនិងម៉ូតូ សរុបទាំង៣គ្រឿង ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់បន្តទៀត ៕