រាជធានីភ្នំពេញ ៖ ផ្ទះបងប្អូនប្រជាពលរដ្ឋមួយកន្លែង ត្រូវបានអគ្គិភ័យឆាបឆេះយ៉ាងសន្ធោសន្ធៅ បង្កការភ្ញាក់ផ្អើលដល់បងប្អូនប្រជាពលរដ្ឋ និងសមត្ថកិច្ច រួមទាំងរថយន្តពន្លត់អគ្គិភ័យចុះមកធ្វើការបាញ់ពន្លត់ កាលពីវេលាម៉ោង ១១និង១០នាទីព្រឹក ថ្ងៃទី២៧ ខែធ្នូ ឆ្នាំ២០២១ នៅតាមបណ្តោយផ្លូវបេតុង ក្រុមទី២ ភូមិស្ពានថ្ម សង្កាត់ស្ពានថ្ម ខណ្ឌដង្កោ រាជធានីភ្នំពេញ ។ នេះបើយោងតាមផេក នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ ។

សមត្ថកិច្ចបានឲ្យដឹងថា ម្ចាស់ផ្ទះកើតហេតុនេះ មានឈ្មោះ ម៉េត ផល្លា ភេទស្រី អាយុ ៦១ ឆ្នាំ មុខរបរកសិករ ហើយមុនពេលកើតហេតុ មានការ ឆ្លងចរន្តអគិ្គសនី ក៏បណ្តាលឲ្យឆេះផ្ទះ ប្រភេទថ្មក្រោមឈើលើទំហំ ០៨ម៉ែត្រ x ០៦ម៉ែត្រ អស់ចំនួន០១ខ្នង តែចាត់ទុកថាសំណាងមួយដែរ ដែលពុំបណ្តាលឲ្យឆេះរាលដាលដល់ផ្ទះអ្នកនៅក្បែរខាងឡើយ ។

ប្រភពព័ត៌មានពីសមត្ថកិច្ច បានបញ្ជាក់ប្រាប់ក្រុមការងារTVFB ឲ្យដឹងថា មុនពេលកើតហេតុ មានការឆ្លងចរន្តអគ្គិសនីឆេះចេញពីផ្ទះខាងលើយ៉ាងសន្ធោសន្ធៅតែម្តង ទើបបង្កអោយមានការភ្ញាក់ផ្អើលដល់សមត្ថកិច្ចខណ្ឌដង្កោ ដឹកនាំដោយលោកស្រី គឹម ញឹប អភិបាលខណ្ឌដង្កោ និងសមត្ថកិច្ចមូលដ្ឋាន សហការជាមួយជំនាញ ពន្លត់អគ្គីភ័យ នៃស្នងការដ្ឋាននគរបាលរាជធានីភ្នំពេញ ចុះទៅដល់កន្លែងកើតហេតុផងដែរ ប៉ុន្តែដោយសារស្ថានភាពផ្លូវរាងឆ្ងាយបន្តិច ហើយថែមទាំងមានខ្យល់បក់ទៀតនោះ ទើបធ្វើអោយអណ្តាតភ្លើងឆាបឆេះកាន់តែលឿនខ្លាំងឡើងៗ រហូត រថយន្តការិយា ល័យ អគ្គិភ័យ ចំនួន ០៣ គ្រឿង បានចុះទៅអន្តរាគមន៍នៅទីតាំងកើតហេតុ ដោយប្រើប្រាស់ទឹកអស់ ០៣ រថយន្ត ស្មើរនឹង ១២ ម៉ែត្រគូប និងមាន រថយន្តក្រុមហ៊ុនស្រាបៀរកម្ពុជាចំនួន ០១ គ្រឿង ប្រើប្រាស់ទឹក ០១ រថយន្ត ស្មើនឹង ០៦ ម៉ែត្រគូប ទើបរលត់ទៅវិញនៅម៉ោង ១២ ថ្ងៃត្រង់ដដែល ។

មិនតែប៉ុណ្ណោះ បើតាមរបាយការណ៍របស់សមត្ថកិច្ចនគរបាលប៉ុស្តិ៍ស្ពានថ្ម បានឲ្យដឹងថា អគ្គិភ័យនេះបានឆេះបំផ្លាញ លុយដុល្លារ ៦០០០ដុល្លារ មាស១ជី និងប្លង់ដី១សន្លឹកផងដែរ ៕