រាជធានីភ្នំពេញ ៖ បុរសម្នាក់ បានបើករថយន្ដ Ford Raptor ស៊េរីទំនើបមួយគ្រឿងយ៉ាងលឿន បានទៅបុករថយន្ដ Toyota Fortuner មួយគ្រឿង រួចបន្ដទៅបុករះត្រូវម៉ូតូ២គ្រឿងទៀត សំណាងល្អណាស់ មនុស្សគ្រាន់តែរងរបួសស្រាលប៉ុណ្ណោះ បង្កការភ្ញាក់ផ្អើល កាលពីវេលាម៉ោង១០យប់ ថ្ងៃទី ២៧ ខែធ្នូ ឆ្នាំ២០២១ នៅតាមបណ្ដោយផ្លូវព្រះមុន្នីវង្ស ក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ ។

ប្រភពព័ត៌មានពីអ្នកបើកបរម៉ូតូ Scoopy មួយគ្រឿង បានឲ្យដឹងថា មុនពេលកើតហេតុ គាត់បានជិះម៉ូតូស្កុបពីនេះ ជាមួយនឹងមិត្តភក្តិរបស់គាត់ តាមផ្លូវ២១៤ មកដល់ស្តុបបំបែកជាបួន ក៏មានរថយន្តម៉ាក Ford Raptor មួយគ្រឿង ដែលពាក់ស្លាកលេខភ្នំពេញ 2BI-8603 ដែលបើកក្នុងល្បឿនលឿន បំពានភ្លើងស្ដុបក្រហម បានបុកម៉ូតូ២គ្រឿង និងបន្ដទៅបុករថយន្ត Fortuner គ្រឿងទៀត ដែលពា្លក់ស្លាកលេខ ភ្នំពេញ 2BI-9092 បណ្ដាលឲ្យរងការខូចខាតយ៉ាងដំណំ ទាំង៣គ្រឿងតែម្តង ប៉ុន្តែសំណាងណាស់ មនុស្សគ្រាន់តែរងរបួសស្រាលប៉ុណ្ណោះ ។

ក្រោយកើតហេតុ សមត្ថកិច្ចជំនាញចរាចរណ៍របស់អធិការដ្ឋាននគរបាលខណ្ឌដូនពេញ សហការជាមួយនគរបាលចរាចរណ៍ជំនាញក្រុង ចុះមកធ្វើការវាស់វែង យករថយន្តនិងម៉ូតូខាងលើ ទៅរក្សាទុកនៅ ស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយគ្នាតាមច្បាប់បន្តទៀត ៕ Mrr Ka