រាជធានីភ្នំពេញ ៖ បុរសម្នាក់បានបើកម៉ូតូកង់បីឥណ្ឌា ខ្វះការប្រុងប្រយ័ត្ន បានបុកគ្នាជាមួយនឹងរថយន្ដហាយឡែនឌ័រមួយគ្រឿង បណ្ដាលឲ្យក្រឡាប់កង់បីផ្ងារជើងឡើងលើ តែម្តង សំណាងគ្រាន់តែរបួសស្រាល បង្កការភ្ញាក់ផ្អើលកាលពីវេលាម៉ោង១យប់ ថ្ងៃទី ២៨ ខែធ្នូ ឆ្នាំ ២០២១ នៅតាមបណ្ដោយផ្លូវ ២០១១ ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ។

ប្រភពព័ត៌មានពីម្ចាស់រថយន្តហាយឡែនឌ័រ បានឲ្យដឹងថា មុនពេលកើតហេតុ គាត់បានដឹកប្រពន្ធរបស់គាត់ត្រឡប់ទៅផ្ទះវិញ ដោយបានបើករថយន្តម៉ាក ហាយឡែនឌ័រ ដែលពាក់ស្លាកលេខ ភ្នំពេញ 2AU-9384 បានធ្វើដំណើរតាមបណ្ដោយផ្លូវ ២០១១ ក្នុងទិសដៅពីជើងទៅត្បូង លុះមកដល់ចំណុចកើតហេតុ ក៏ស្រាប់តែមានបុរសម្នាក់ បានបើកម៉ូតូកង់បីឥណ្ឌា ដែលពាក់ស្លាកលេខ កណ្ដាល 1AI-0449 រេចង្កូតមកបុកត្រូវរថយន្តរបស់គាត់ពេញមួយទំហឹងតែម្តង បណ្ដាលឲ្យរងការខូចខាតមួយចំហៀងរថយន្ត និងក្រឡាប់កង់បីនោះច្រង៉ាង ។

ក្រោយពេលកើតហេតុ សមត្ថកិច្ចប៉ុស្តិ៍នគរបាលសង្កាត់គោកឃ្លាង បានទំនាក់ទំនង ទៅកាន់សមត្ថកិច្ចជំនាញចរាចរណ៍ របស់អធិការដ្ឋាននគរបាលខណ្ឌសែនសុខ ដើម្បីចុះមកធ្វើការវែងវាស់ និងស្ទូចយកកង់បីឥណ្ឌា និងរថយន្ត យកទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីរង់ចាំដោះស្រាយគ្នានៅពេលក្រោយតាមច្បាប់បន្តទៀត ៕ Mrr Ka