រាជធានីភ្នំពេញ ៖ ករណីឃាតកម្ម ជនជាតិចិន បានយកកាំបិតចាក់សម្លាប់ទៅលើស្ត្រីជនជាតិចិនម្នាក់ទៀត បណ្តាលឲ្យស្លាប់យ៉ាងរន្ធត់ ក្រោយបញ្ជូនទៅដល់មន្ទីរពេទ្យ រួចហើយជនដៃដល់ជាឃាតក បានរត់គេចខ្លួនពីភ្នំពេញ ទៅសម្ងំលាក់ខ្លួននៅខេត្តស្វាយរៀង ពេលនេះត្រូវបានសមត្ថកិច្ចចាប់ខ្លួនបានហើយ នៅព្រឹកថ្ងៃទី២៨ ខែធ្នូ ឆ្នាំ២០២១នេះ នៅក្នុងភូមិត្រពាំងស្មាច់ ស្រុករំដួល ខេត្តស្វាយរៀង។
តាមរបាយការណ៍លម្អិតរបស់សមត្ថកិច្ចព្រហ្មទណ្ឌខណ្ឌដង្កោ ដែលក្រុមការងារTVFB ទទួលបាន ឲ្យដឹងថា ជនសង្ស័យដែលឃាត់ខ្លួននេះមានឈ្មោះ សាវ វិន (XIAO WEN) ភេទប្រុស អាយុ ៣៤ ឆ្នាំ ជនជាតិចិន មុខរបរប្រធានផ្នែកដេរ កាន់លិខិតឆ្លងដែនលេខ EO1271955 ស្នាក់នៅក្នុងរោងចក្រគោលដេនហ្គ្រេស ស្ថិតនៅ ភូមិអន្លង់គងថ្មី សង្កាត់ព្រៃស ខណ្ឌដង្កោ រាជធានីភ្នំពេញ។
ចំណែកជនរងគ្រោះមានឈ្មោះ ឌៀង លី ( DING LI) ភេទស្រីអាយុ ៣៧ ឆ្នាំជនជាតិចិន កាន់លិខិតឆ្លងដែនលេខ EF5967276 មុខរបរប្រធានរោងចក្រ ស្នាក់នៅក្នុងរោងចក្រគោលដេនហ្គ្រេស ស្ថិតនៅ ភូមិអន្លង់គងថ្មី សង្កាត់ព្រៃស ខណ្ឌដង្កោ រាជធានីភ្នំពេញ។
សូមបញ្ជាក់ផងដែរថា កាលពីវេលាម៉ោង៤ល្ងាច ថ្ងៃទី២៥ ខែធ្នូ ឆ្នាំ២០២១ ជនរងគ្រោះនិងជនសង្ស័យមានទំនាស់គ្នានៅក្នុងបន្ទប់លេខ ៨ និងលេខ ៩ ក្នុងបរិវេណរោងចក្រគោលដេនហ្គ្រេស ក្នុងភូមិអន្លង់គងថ្មី សង្កាត់ព្រៃស ខណ្ឌដង្កោ រាជធានីភ្នំពេញ ហើយក៏បានស្ងប់ស្ងាត់ទៅវិញ រហូតដល់ម៉ោង ១១និង២៥នាទីយប់ ជនសង្ស័យនិងជនជាតិចិនផ្សេងទៀត ដែលបានធ្វើការនៅក្នុងរោងចក្រ ត្រឡប់មកពីផឹកស៊ីវិញចូលមកក្នុងរោងចក្រ ជនសង្ស័យក៏មានទំនាស់ជាមួយនឹងជនរងគ្រោះជាលើកទី២ ឈានដល់ការវាយប្រតប់គ្នាទៅវិញទៅមក ហើយជនសង្ស័យក៏បានដកកាំបិតចាក់ជនរងគ្រោះពីក្រោយខ្នងរបួសធ្ងន់ បន្ទាប់មកថៅកែរោងចក្រ ក៏យករថយន្តLuxus RX300 ពណ៌ស លើកជនរងគ្រោះដាក់រថយន្តទៅមន្ទីរពេទ្យកាល់ម៉ែត្រ ដើម្បីសង្គ្រោះបន្ទាន់។ ក្រោយពេលធ្វើសកម្មភាពរួច ជនសង្ស័យបានឡើងផ្លោះរបងទ្វារចេញ គេចខ្លួនទៅបាត់។
ក្រោយបញ្ជូនដល់មន្ទីរពេទ្យ នៅថ្ងៃទី ២៦ ខែធ្នូ ឆ្នាំ ២០២១១២និង២៥នាទី ជនរងគ្រោះក៏បានស្លាប់នៅក្នុងមន្ទីរពេទ្យតែម្ដង ។
ចំណែកជនសង្ស័យជាឃាតក ត្រូវបានសមត្ថកិច្ចនគរបាលព្រហ្មទណ្ឌខណ្ឌដង្កោ ដឹកនាំបញ្ជាដោយផ្ទាល់ ដោយលោកវរសេនីយ៍ឯក ជឹម ស៊ីថា សហការជាមួយសមត្ថកិច្ចខេត្តស្វាយរៀង ឈានដល់ការចាប់ខ្លួនជនសង្ស័យរូបនេះបាន នៅព្រឹកថ្ងៃទី២៨ ខែធ្នូ ឆ្នាំ២០២១នេះ ក្នុងភូមិត្រពាំងស្មាច់ ស្រុករំដួល ខេត្តស្វាយរៀង ខណៈកំពុងសម្ងំលាក់ខ្លួន នាំយកមកកាន់ អធិការដ្ឋាននគរបាលខណ្ឌដង្កោ ដើម្បីសាកសួរ និងកសាងសំណុំរឿងបញ្ជូនខ្លួនទៅកាន់តុលាការ ចាត់ការតាមច្បាប់បន្តទៀត ។ រីឯសពជនរងគ្រោះ ត្រូវ បានតម្កល់នៅក្នុងវត្តស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ ដើម្បីរង់ចាំសាច់ញាតិមកទទួលយកទៅធ្វើបុណ្យ ៕ មេសា
