រាជធានីភ្នំពេញ ៖ បុរសម្នាក់ បើករថយន្ដស៊េរីទំនើបមួយគ្រឿង បានបុកគ្នាជាមួយនឹងរថយន្ដដឹកមាន់ មួយគ្រឿងទៀត ពេញទំហឹង បណ្ដាលឲ្យរងការខូចខាតរថយន្តយ៉ាងដំណំតែម្តង ខ្ទេចក្បាលខាងមុខ សំណាងណាស់គ្មាននរណាម្នាក់ រងរបួសនោះទេ បង្កការភ្ញាក់ផ្អើលកាលពីវេលាម៉ោង ៥ព្រឹក ថ្ងៃទី២៩ ខែធ្នូ ឆ្នាំ២០២១នៅតាមបណ្ដោយផ្លូវ ២៦១ ក្នុងសង្កាត់ទឹកល្អកក់ទី១ ខណ្ឌទួលគោក រាជធានីភ្នំពេញ ។

ប្រភពព័ត៌មានពីម្ចាស់រថយន្តស៊េរីទំនើប ដែលពាក់ស្លាកលេខ ភ្នំពេញ 2AE-0899 បានឲ្យដឹងថា គាត់បានធ្វើដំណើរតាមផ្លូវ១៣២ ក្នុងទិសដៅពីកើតមកលិច លុះមកដល់ចំណុចកើតហេតុ ជាផ្លូវបំបែកជាបួន ក៏មានរថយន្តប្រភេទធុនធំដឹកមាន់មួយគ្រឿង ដែលពាក់ស្លាកលេខ ស្វាយរៀង 3A-5454 ធ្វើដំណើរតាមបណ្ដោយផ្លូវ ២៦១ ក្នុងទិសដៅពីជើងទៅត្បូង ក៏បានបុកគ្នាពេញមួយទំហឹង បណ្ដាលឲ្យរថយន្តស៊េរីទំនើបខាងលើ រងការខូចខាតយ៉ាងដំណំ និងមានការជជែកគ្នារកខុសត្រូវ យ៉ាងតឹងសសៃកផងដែរ។

ក្រោយពេលកើតហេតុ សមត្ថកិច្ចជំនាញចរាចរណ៍ របស់អធិការដ្ឋាននគរបាលខណ្ឌទួលគោក បានដល់ចំណុចទីតាំងកកើតហេតុ ដោយទុកពេលឲ្យភាគីទាំងសងខាង ធ្វើការសម្របសម្រួលគ្នាសិន ផងដែរ ៕ Mrr Ka