ខេត្តកំពង់ចាម ៖ រថយន្តកាមរីបាឡែន មួយគ្រឿង កំពុងបើកសុខៗតាមដងផ្លូវ ស្រាប់តែឆ្លងប្រពន្ធ័ភ្លើង បណ្តាលឲ្យឆាបឆេះយ៉ាងសន្ធោសន្ធៅតែម្តង កាលពីវេលាម៉ោង ៧យប់ ថ្ងៃទី ២៧ ខែធ្នូ ឆ្នាំ២០២១ នៅតាមបណ្តោយ ផ្លូវជាតិលេខ៦ ចន្លោះគីឡូម៉ែត្រលេខ ៧១-៧២ ដែលស្ថិតនៅភូមិឈើទាល ឃុំផ្តៅជុំ ស្រុកជើងព្រៃ ខេត្តកំពង់ចាម ។ នេះបើយោងតាមផេក នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ ។

សមត្ថកិច្ចបានឲ្យដឹងថា អគ្គិភ័យនេះបានឆាបឆេះរថយន្តចំនួន០១គ្រឿងម៉ាក កាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2AG-2634 បើកបរដោយឈ្មោះ វ៉េង វាង ភេទ ប្រុស អាយុ ៣២ ឆ្នាំ ស្នាក់នៅភូមិតាំងជ្រៃ ឃុំសណ្តែក ស្រុកបាធាយ ខេត្តកំពង់ចាម បើកពីលិចទៅកើតដល់ចំណុចកើត ហេតុ រថយន្តនេះ បានឆ្លងប្រពន្ធ័ភ្លើងបណ្តាលឲ្យឆាបឆេះតែម្តង តែពុំមានគ្រោះថ្នាក់ដល់មនុស្សនោះ ទេ ។

ក្រោយកើតហេតុ កម្លាំងជំនាញ ពន្លត់ អគ្គិភ័យ របស់ អធិការដ្ឋាននគរបាលស្រុកជើងព្រៃ បានជួយអន្តរាគមន៍ប្រើរថយន្តពន្លត់អគ្គិភ័យចំនួន ០១គ្រឿង ប្រើប្រាស់ទឹកអស់ចំនួន០១រថយន្ត ទើបរលត់ទៅវិញជាស្ថាពរ ៕