ខេត្តឧត្តរមានជ័យ ៖ ជនសង្ស័យម្នាក់ ជាមុខសញ្ញាជួញដូរគ្រឿងញៀនយ៉ាងសកម្ម ត្រូវបានសមត្ថកិច្ចស្រុកអន្លង់វែង ស្រាវជ្រាវបង្រ្កាបនិងចាប់ឃាត់ខ្លួនបាន រកឃើញនិងដកហូតបានថ្នាំញៀនជិត៥០កញ្ចប់ឯណោះ រួមទាំងវត្ថុតាងមួយចំនួនទៀត ដែលការបង្ក្រាបនេះបានធ្វើឡើង កាលពីវេលាម៉ោង១ និង៣០នាទីរសៀល ថ្ងៃទី២៧ ខែធ្នូ ឆ្នាំ២០២១ នៅចំណុចផ្ទះជនសង្ស័យ ស្ថិតនៅភូមិអភិវឌ្ឍន៍ ឃុំអន្លង់វែង ស្រុកអន្លង់វែង ខេត្តឧត្តរមានជ័យ ។ នេះបើយោងតាមផេក អធិការដ្ឋាននគរបាលស្រុកអន្លង់វែង ។

សមត្ថកិច្ចបានឲ្យដឹងថា ការបង្ក្រាបនេះ គឺមានការដឹកនាំបញ្ជាផ្ទាល់ ពីលោកឧត្តមសេនីយ៍ទោ ហួត សុធី ស្នងការនគរបាលខេត្ត និងមានការដឹកនាំសម្របសម្រួលនិតិវិធី ពីឯកឧត្តម តូច សុភក្តី ព្រះរាជអាជ្ញាអមសាលាដំបូងខេត្ត ព្រមទាំងមានការចង្អុលបង្ហាញ ពីលោកវរសេនីយ៍ឯក ស៊ីម វណ្ណៈ ស្នងការរងទទួលផែនការងារប្រឆាំងគ្រឿងញៀនផងដែរ ទើបលោកវរសេនីយ៍ទោ ស៊ូ នូវ អធិការនគរបាលស្រុកអន្លង់វែង បានដឹកនាំកម្លាំងផែនការងារប្រឆាំងគ្រឿងញៀន និងកម្លាំងអន្តរាគមន៍ ចុះស្រាវជ្រាវបង្រ្កាបមុខសញ្ញាជួញដូរ និងប្រើប្រាស់ដោយខុសច្បាប់នូវសារធាតុញៀន នេះបានតែម្តង ។

សមត្ថកិច្ចបន្តថា ជនសង្ស័យដែលឃាត់ខ្លួនបាននេះ មានឈ្មោះ គឹម ច័ន្ទសុភ័ក្ដិ ភេទ ប្រុស អាយុ ៣៩ឆ្នាំ រស់នៅភូមិអភិវឌ្ឍន៍ ឃុំ អន្លង់វែង ស្រុកអន្លង់វែង និងធ្វើការដកហូតបាន ៖

+ ថ្នាំញៀនមេតាំហ្វេតាមីនប្រភេទម៉ាទឹកកក ( ICE ) ចំនួន ៤៨ កញ្ចប់ ( កញ្ចប់ធំ ៤០កញ្ចប់, កញ្ចប់តូច ៨កញ្ចប់ ) ទម្ងន់ ៧៧៤ ក្រាម

+ ម៉ូតូ ១ គ្រឿង ម៉ាក exciter ពណ៌ខៀវ ស៊េរី២០១៦

+ ទូរសព្ទដៃ ១ គ្រឿង

+ ជញ្ជីងថ្លឹងថ្នាំញៀន ចំនួន ១

+ សម្ភារៈប្រើប្រាស់ និងវេចខ្ចប់គ្រឿងញៀនមួយចំនួន ។

បច្ចុប្បន្ន ជនសង្ស័យខាងលើ ត្រូវបានឃាត់ខ្លួននៅអធិការដ្ឋាននគរបាលស្រុក ដើម្បីសាកសួរ និងកសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្ត ចាត់ការតាមផ្លូវច្បាប់បន្តទៀត ៕