រាជធានីភ្នំពេញ៖ គ្រោះថ្នាក់ចរាចរណ៍មួយបានកើតឡើង រវាងម៉ូតូសណ្តោងរម៉កដឹកដែក ឡើងទួលមិនរួច អកហ្សឺថយក្រោយ បុកផ្ទប់កញ្ចក់រថយន្តឡិចស៊ីសRX330 បែកកញ្ចក់ សំណាងមនុស្សនៅក្នុងរថយន្តរបួសស្រាល បង្កឲ្យមានការកកស្ទះយ៉ាងខ្លាំង នៅត្រង់ចំណុចនិងស្ថានីយបូមទឹកបឹងទំពុន តាមបណ្តោយផ្លូវ៣៧១ ក្នុងសង្កាត់បឹងទំពុន២ ខណ្ឌមានជ័យ រាជធានីភ្នំពេញ វេលាម៉ោងជិត១២ព្រឹក ថ្ងៃទី៣០ ខែធ្នូ ឆ្នាំ២០២១នេះ។

ប្រភពព័ត៌មានពីសមត្ថកិច្ច បានបញ្ជាក់ប្រាប់ក្រុមការងារTVFB ឲ្យដឹងថា មុនពេលកើតហេតុ ម៉ូតូសណ្តោងរម៉កដឹកដែកបើកបរ ដោយបុរសម្នាក់ រួមដំណើរគ្នា២នាក់ ធ្វើដំណើរតាមបណ្តោយផ្លូវ៣៧១ពីកើតមកលិច មកដល់ចំណុចកើតហេតុខាងលើបាន ឡើងទួលមិនរួច អកហ្សឺថយក្រោយ មកបុកផ្ទប់កញ្ចក់រថយន្តឡិចស៊ីសRX330 ដែលពាក់ស្លាកលេខ ភ្នំពេញ 2AP 5579 ដែលធ្វើដំណើរ២នាក់ប្តីប្រពន្ធមកពីក្រោយ បណ្តាលឲ្យបែកកញ្ចក់រថយន្ត តែសំណាងល្អដែលមនុស្សនៅក្នុងរថយន្តរបួសស្រាល ។

ក្រោយពីកើតហេតុសមត្ថកិច្ចមូលដ្ឋាននៃប៉ុស្តិ៍រដ្ឋបាលសង្កាត់បឹងទំពុនទី២ បានចុះទៅដល់ទីតាំងកើតហេតុ បានធ្វើការវាស់វែងយករថយន្តនិងម៉ូតូសណ្តោងរ៉ឺម៉ក មកដាក់អែបជាងកុំឲ្យមានការកកស្ទះដល់បងប្អូនប្រជាពលរដ្ឋ ក្រោយមកម្ចាស់ម៉ូតូសណ្ដោងរ៉ឺម៉កបានចេញសំណងសងថ្លៃខូចខាតចំពោះរថយន្តចំនួន២៤០ដុល្លារ ដើម្បីបញ្ចប់រឿងនៅទីតាំងចំណុចកើតហេតុតែម្ដង៕ មេសា​