រាជធានីភ្នំពេញ៖ បុរសម្នាក់បើករថយន្ដខ្វះការប្រុងប្រយ័ត្ន បានរេចង្កូត ទៅបុកនឹងរបាំងថ្មពុះចែកទ្រូងផ្លូវ បណ្ដាលឲ្យដាច់ក្រឡេកង់មុខ ទៅណាលែងរួចតែម្តង បង្កការភ្ញាក់ផ្អើលដល់អ្នកដំណើរតាមដងផ្លូវ កាលពីវេលាម៉ោង ៩យប់ ថ្ងៃទី៣០ ខែធ្នូ ឆ្នាំ២០២១ នៅតាមបណ្ដោយផ្លូវម៉ៅសេទុង ក្នុងសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ។
ប្រភពព័ត៌មានពីបងប្អូនប្រជាពលរដ្ឋ បានអោយដឹងថា មុនពេលកើតហេតុ គេបានឃើញរថយន្ដ តាកូម៉ា មួយគ្រឿង ដែលពាក់ស្លាកលេខ ភ្នំពេញ 2AN-3236 បើកតាមបណ្ដោយផ្លូវម៉ៅសេទុង ភ្លាមនោះរថយន្ដក៏បានរេចង្កូតទៅបុកក្បាលព្រួញពុះចែកទ្រូងផ្លូវ បណ្ដាលអោយរថយន្ដដាច់កង់ខាងមុខមួយចំហៀង រងការខូចខាតយ៉ាងដំណំតែម្តង។
ក្រោយពេលកើតហេតុ សមត្ថកិច្ចក៏បានមកដល់ ស្ទូចយករថយន្ដតាកូម៉ាខាងលើ ទៅរក្សាទុក នៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់ចូលខ្លួនមកដោះស្រាយគ្នាតាមផ្លូវច្បាប់បន្តទៀត ៕ Mrr Ka
