រាជធានីភ្នំពេញ ៖ ជនបរទេសម្នាក់ បានបើករថយន្ដVigo មួយគ្រឿង យ៉ាងលឿន បានទៅបុកឃឿនផ្លូវ បន្ដហោះទៅបុករថយន្ដជាច្រើនគ្រឿងទៀត បណ្តាលឲ្យរងការខូចខាតយ៉ាងដំណំតែម្តង កាលពីវេលាម៉ោង១១យប់ ថ្ងៃទី២ ខែមករា ឆ្នាំ២០២២ នៅតាមបណ្ដោយផ្លូវវិមានឈ្នះៗ ក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ។

ប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញជនជាតិបរទេសម្នាក់ បានបើករថយន្ត Vigo ពាក់ស្លាកលេខ ភ្នំពេញ 2AX-0686 យ៉ាងលឿន ធ្វើដំណើរតាមបណ្ដោយផ្លូវមានឈ្នះៗ ក្នុងទិសដៅពីកើតមកលិច លុះមកដល់ចំណុចកើតហេតុ រថយន្តខាងលើ ក៏បានរេចង្កូតទើបបុកឡើងឃឿនពុះចែកទ្រូងផ្លូវ បន្តបុករះរថយន្តជាច្រើនគ្រឿង ដែលចតនៅខាងមុខមន្ទីរសម្ភពព្យាបាលមួយកន្លែង បណ្ដាលឲ្យរងការខូចខាតជាច្រើនគ្រឿង តែសំណាងណាស់ គ្មាននរណាម្នាក់ រងរបួសនោះទេ។

ក្រោយពេលកើតហេតុ សមត្ថកិច្ចមូលដ្ឋាន ក៏បានមកដល់បានធ្វើការឃាត់អ្នកបើកបររថយន្ត ដែលជាជនជាតិបរទេសខាងលើនោះ យកទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ និងស្ទូចយករថយន្តជាច្រើនគ្រឿងដែលរងការខូចខាត យកទៅរក្សាទុក ដើម្បីរង់ចាំការដោះស្រាយទៅតាមនិតិវិធីច្បាប់បន្តទៀត ៕ Mrr Ka