រាជធានីភ្នំពេញ ៖ រថយន្តស៊េរីទំនើប ខ្មៅរលើបរលោងមួយគ្រឿង បានខ្ទេចមើលស្ទើរលែងយល់តែម្តង ខណៈរថយន្តនេះ បានបើកបរដោយជនបរទេសម្នាក់ ក្នុងល្បឿនយ៉ាងលឿន ទៅបុកគម្របមាត់លូ បណ្តាលឲ្យក្រឡាប់ទៅបោកនឹងបង្គោលភ្លើង បាក់ខ្ទេចតែម្តង កាលពីវេលាម៉ោង១ និង១០នាទីយប់ឈានចូលថ្ងៃទី ៣ ខែមករា ឆ្នាំ២០២១ នៅតាមបណ្ដោយផ្លូវ១០០៨ ក្នុងសង្កាត់ទួលសង្កែទី២ ខណ្ឌឬស្សីកែវ រាជធានីភ្នំពេញ។

ប្រភពព័ត៌មានពីសមត្ថកិច្ច នៅកន្លែងកើតហេតុ បានប្រាប់ឲ្យដឹងថា មុនពេលកើតហេតុ គេបានឃើញជនបរទេសម្នាក់ បានបើករថយន្តម៉ាក BMW ពណ៌ខ្មៅ មួយគ្រឿង ពាក់ស្លាកលេខ ភ្នំពេញ 2BB-1851 តាមបណ្តោយផ្លូវខាងលើ ក្នុងទិសដៅពីលិចមកកើត លុះដល់ចំណុចកើតហេតុ បានរេចង្កូតមកបុក គម្របមាត់លូ បណ្តាលឲ្យក្រឡាប់ទៅបោកនឹងបង្គោលភ្លើង បាក់ខ្ទេចមួយដើម តែម្តង ខ្ទេចរថយន្តមើលស្ទើរលែងយល់ រីឯតៃកុងរថយន្តត្រូវបានសមត្ថកិច្ចឃាត់ខ្លួនបានភ្លាមៗផងដែរ ។

ក្រោយកើតហេតុសមត្ថកិច្ចនគរបាលមូលដ្ឋាន សហការជាមួយនគរបាលចរាចរណ៍ជំនាញ ចុះមកធ្វើការវាស់វែង យករថយន្តខាងលើ ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយតាមច្បាប់បន្តទៀត ៕