​ប៉េកាំង៖ ក្រសួងការបរទេសចិន បាននិយាយកាលពីថ្ងៃចន្ទ (១៧ មករា) ថា ប្រទេសចិន បានស្ដារឡើងវិញ នូវចរាចរណ៍ដឹកជញ្ជូនតាមផ្លូវដែក ជាមួយកូរ៉េខាងជើង ដែលត្រូវបានផ្អាកដោយសារការព្រួយបារម្ភអំពីជំងឺរាតត្បាតកូវីដ១៩។ នេះបើយោងតាមការចេញផ្សាយដោយសារព័ត៌មាន channel news asia នៅថ្ងៃទី១៧ ខែមករា ឆ្នាំ២០២២។

អ្នកនាំពាក្យក្រសួងការបរទេសចិន លោក Zhao Lijian បាននិយាយថា ការតភ្ជាប់ឆ្លងកាត់ទន្លេ Yalu រវាង Dandong របស់ប្រទេសចិន និង Sinuiju ក្នុងប្រទេសកូរ៉េខាងជើង ត្រូវបានស្តារឡើងវិញ បន្ទាប់ពី «ការពិគ្រោះយោបល់ជាមិត្តភាពរវាងភាគីទាំងពីរ»។ លោក Zhao បាននិយាយថា ពាណិជ្ជកម្មធម្មតានឹងត្រូវបានរក្សាទុក ខណៈពេលដែលការគ្រប់គ្រងជំងឺរាតត្បាតនៅតែបន្ត ប៉ុន្តែមិនបានផ្តល់ព័ត៌មានលម្អិតផ្សេងទៀតទេ។

ក្រោមការដាក់ទណ្ឌកម្មរបស់អង្គការសហប្រជាជាតិ និងសហរដ្ឋអាមេរិករួចទៅហើយ ប្រទេសកូរ៉េខាងជើង បានបិទព្រំដែនរបស់ខ្លួន ដើម្បីការពារការឆ្លងមេរោគកូវីដ១៩ ដែលដាក់ប្រព័ន្ធថែទាំសុខភាព ដែលផុយស្រួយរបស់ខ្លួន ស្ថិតនៅក្រោមភាពតានតឹងបន្ថែមទៀត។ ដោយមានព័ត៌មានតិចតួចចេញពីរដ្ឋកុម្មុយនិស្តឯកកោមួយនេះ វាមិនច្បាស់ទេថាតើ កូរ៉េខាងខាងជើងបានទទួលរងពីជំងឺរាតត្បាតខ្លាំងប៉ុណ្ណានោះទេ។

ប្រទេសចិន នៅតែជាសម្ព័ន្ធមិត្តដ៏សំខាន់របស់កូរ៉េខាងជើង និងជាប្រភពនៃជំនួយសេដ្ឋកិច្ច ទោះបីជាបានចុះហត្ថលេខាលើការដាក់ទណ្ឌកម្មលើកម្មវិធីនុយក្លេអ៊ែរ និងមីស៊ីលរបស់ទីក្រុងព្យុងយ៉ាងក៏ដោយ។

កូរ៉េខាងជើង បានបាញ់កាំជ្រួចមីស៊ីលផ្លោងចំនួនពីរគ្រាប់ ចូលទៅក្នុងសមុទ្រកាលពីថ្ងៃច័ន្ទ នៅក្នុងការបាញ់បង្ហោះអាវុធលើកទីបួនរបស់ខ្លួនក្នុងខែនេះ ជាក់ស្តែងដើម្បីបង្ហាញពីសមត្ថភាពយោធារបស់ខ្លួន ចំពេលមានការផ្អាកការទូតជាមួយសហរដ្ឋអាមេរិក និងការបិទព្រំដែនជំងឺរាតត្បាត។

លោក Zhao មិនបានឆ្លើយតបដោយផ្ទាល់ទៅនឹងសំណួរអំពីការបាញ់បង្ហោះនោះទេ ប៉ុន្តែបាននិយាយថា ប្រទេសចិនបានអំពាវនាវដល់ភាគីទាំងអស់ឱ្យ «ចងចាំអំពីស្ថានភាពទូទៅនៃសន្តិភាព និងស្ថិរភាពនៅលើឧបទ្វីប... និងធ្វើការរួមគ្នា ដើម្បីជំរុញដំណោះស្រាយនយោបាយលើបញ្ហាឧបទ្វីប»៕

ប្រភព៖ channel news asia