សេអ៊ូល៖ អគ្គសេនាធិការចម្រុះរបស់កូរ៉េខាងត្បូង បាននិយាយថា កូរ៉េខាងជើង បានបាញ់អ្វីដែលមើលទៅដូចជា មីស៊ីលចេញពីនាវាពីរគ្រាប់ ចូលទៅក្នុងសមុទ្រ ពីឆ្នេរសមុទ្រភាគខាងកើតរបស់ខ្លួន កាលពីថ្ងៃអង្គារ (២៥ មករា) ប៉ុន្មានថ្ងៃ បន្ទាប់ពីការសាកល្បងមីស៊ីល​បាលីស្ទីក។ នេះបើតាមសារព័ត៌មាន Channel News Asia ចេញផ្សាយនៅថ្ងៃទី២៦ ខែមករា ឆ្នាំ២០២២។

ការបាញ់សាកល្បង​បែបនេះ នឹងក្លាយជាការបាញ់សាកល្បង មីស៊ីល​លើកទី៥ ក្នុងឆ្នាំនេះ ខណៈដែលមេដឹកនាំកូរ៉េខាងជើង លោក គីម ជុងអ៊ុន បានប្ដេជ្ញាថា នឹងពង្រឹងវិស័យយោធា ជាមួយនឹងបច្ចេកវិទ្យាទំនើបបំផុត ខណៈ​ដែលកិច្ចចរចាជាមួយកូរ៉េខាងត្បូង និងសហរដ្ឋអាមេរិកបានជាប់គាំង។

ការបាញ់សាកល្បងដ៏ធំបំផុតរបស់ប្រទេសឯកោមួយនេះ ចាប់តាំងពី​ឆ្នាំ ២០១៩ បានជំរុញឱ្យមានការបង្ហាញ​ការព្រួយបារម្ភពីអគ្គលេខាធិការអង្គការសហប្រជាជាតិ ហើយរដ្ឋបាល លោកបៃឌិន បានអនុវត្តទណ្ឌកម្មថ្មី។

ការបាញ់មីស៊ីលឆ្លងទ្វីបដោយកូរ៉េខាងជើង មិនត្រូវបានហាមឃាត់ក្រោមទណ្ឌកម្មរបស់អង្គការសហប្រជាជាតិដាក់លើទីក្រុងព្យុងយ៉ាង ដែលបានផ្គើននឹងការថ្កោលទោសអន្តរជាតិ និងបានធ្វើតេស្តមីស៊ីលផ្លោងចំនួនបួនលើក ដែលជាចុងក្រោយបំផុតកាលពីថ្ងៃទី ១៧ ខែមករានេះ។

បន្ថែមពីនេះ ប្រទេសចិន និងរុស្ស៊ី បានជំរុញឱ្យក្រុមប្រឹក្សាសន្តិសុខអង្គការសហប្រជាជាតិ ដកការហាមឃាត់លើការនាំចេញរូបសំណាក អាហារសមុទ្រ និងវាយនភណ្ឌរបស់ទីក្រុងព្យុងយ៉ាង និងបង្កើនការនាំចូលប្រេងចម្រាញ់។

គួរបញ្ជាក់ថា ប្រទេសកូរ៉េខាងជើង បាននិយាយថា ខ្លួនបើកចំហសម្រាប់កិច្ចពិភាក្សា ប៉ុន្តែលុះត្រាតែសហរដ្ឋអាមេរិក និងប្រទេសដទៃទៀត ដកចោលនូវ«គោលនយោបាយអរិភាព»ដូចជាការដាក់ទណ្ឌកម្ម និងសមយុទ្ធយោធា៕​

ប្រភព៖  Channel News Asia