ប៉ាឡេស្ទីន៖ សារព័ត៌មាន CNA ចេញផ្សាយនៅថ្ងៃទី១១ ខែឧសភា ឆ្នាំ២០២២ បានឲ្យដឹងថា អ្នកកាសែតជើងចាស់ របស់ Al Jazeera លោកស្រី Shireen Abu Aqleh ត្រូវបានបាញ់សម្លាប់នៅថ្ងៃពុធ (១១ ឧសភា) ខណៈដែលការវាយឆ្មក់របស់កងទ័ពអ៊ីស្រាអែលលើជំរុំជនភៀសខ្លួន Jenin នៅតំបន់ West Bank ដែលកាន់កាប់។
ប៉ុស្តិ៍ទូរទស្សន៍ដែលមានមូលដ្ឋាននៅកាតាបាននិយាយថា កងកម្លាំងអ៊ីស្រាអែលបានបាញ់សម្លាប់ Abu Aqleh អាយុ៥១ ឆ្នាំ ដោយចេត ខណៈដែលនាយករដ្ឋមន្រ្តីអ៊ីស្រាអែល Naftali Bennett បាននិយាយថា«ទំនងជា» ការបាញ់កាំភ្លើងរបស់ប៉ាឡេស្ទីនបានសម្លាប់នាង។
លោកស្រី Abu Aqleh ជាគ្រិស្តសាសនិក ជនជាតិប៉ាឡេស្ទីន ដែលកាន់សញ្ជាតិអាមេរិក គឺជាឥស្សរជនដ៏លេចធ្លោម្នាក់នៅក្នុងសេវាព័ត៌មានអារ៉ាប់របស់ប៉ុស្តិ៍។ អ្នកសារព័ត៌មាន Al Jazeera ម្នាក់ទៀត ដែលជាផលិតករ Ali al-Samudi បានរងរបួសនៅក្នុងឧបទ្ទវហេតុនេះ ។
អ្នកថតរូប AFP ម្នាក់នៅកន្លែងកើតហេតុបាននិយាយថា Abu Aqleh ពាក់អាវធំសារព័ត៌មាននៅពេលនាងត្រូវបានគេបាញ់។ អ្នកថតរូបបានរាយការណ៍ថា កងកម្លាំងអ៊ីស្រាអែលកំពុងបាញ់នៅក្នុងតំបន់នោះ ហើយបន្ទាប់មកបានឃើញសាកសពរបស់ Abu Aqleh ដេកនៅលើដី។
កងទ័ពអ៊ីស្រាអែលបានអះអាងថា ខ្លួនបានធ្វើប្រតិបត្តិការមួយនៅក្នុងជំរុំជនភៀសខ្លួន Jenin នៅព្រឹកថ្ងៃពុធ ប៉ុន្តែបានបដិសេធយ៉ាងម៉ឺងម៉ាត់ថា ខ្លួនមិនបានកំណត់គោលដៅអ្នកយកព័ត៌មានដោយចេតនានោះទេ។ កងទ័ពបាននិយាយថា មានការបាញ់ប្រហារគ្នារវាងជនសង្ស័យ និងកងកម្លាំងសន្តិសុខ ហើយថា ខ្លួនកំពុង «ស៊ើបអង្កេតព្រឹត្តិការណ៍នេះ និងរកមើលលទ្ធភាពដែលអ្នកកាសែតត្រូវបានវាយប្រហារដោយខ្មាន់កាំភ្លើងប៉ាឡេស្ទីន»។
ក្នុងប៉ុន្មានសប្តាហ៍ថ្មីៗនេះ កងទ័ពបានបង្កើនប្រតិបត្តិការនៅក្រុង Jenin ដែលជាចំណុចសំខាន់ជាប្រវត្តិសាស្ត្រក្នុងជម្លោះអ៊ីស្រាអែល និងប៉ាឡេស្ទីន។ អ្នកវាយប្រហារជាច្រើននាក់ ដែលត្រូវបានស្តីបន្ទោស ចំពោះការវាយប្រហារដ៏សាហាវទៅលើជនជាតិអ៊ីស្រាអែល ក្នុងប៉ុន្មានសប្តាហ៍ថ្មីៗនេះគឺមកពីតំបន់នោះ។
គួរបញ្ជាក់ថា ភាពតានតឹងបានកើនឡើងក្នុងរយៈពេលប៉ុន្មានខែថ្មីៗនេះ ខណៈដែលអ៊ីស្រាអែល បានវាយលុកជាមួយនឹងរលកនៃការវាយប្រហារដែលបានសម្លាប់មនុស្ស យ៉ាងហោចណាស់១៨នាក់ ចាប់តាំងពីថ្ងៃទី២២ ខែមីនា រួមទាំងមន្រ្តីប៉ូលីសអារ៉ាប់-អ៊ីស្រាអែលម្នាក់ និងជនជាតិអ៊ុយក្រែនពីរនាក់។
យោងតាមរបាយការណ៍របស់ AFP បានឱ្យដឹងថា ជនជាតិប៉ាឡេស្ទីន សរុបចំនួន៣០នាក់ និងជនជាតិអារ៉ាប់ អ៊ីស្រាអែល ៣ នាក់បានស្លាប់ក្នុងអំឡុងពេលដូចគ្នានេះ បើយោងតាមការបូកសរុបរបស់ AFP ក្នុងចំណោមពួកគេគឺជាជនល្មើសនៃការវាយប្រហារ និងអ្នកដែលត្រូវបានសម្លាប់ដោយកងកម្លាំងសន្តិសុខអ៊ីស្រាអែល នៅក្នុងប្រតិបត្តិការ West Bank៕
