វ៉ាស៊ីនតោន៖ រដ្ឋមន្ត្រីក្រសួងការពារជាតិអាមេរិក លោក Lloyd Austin បានប្រកាសថា ប្រទេសចំនួន២០ បានផ្តល់កញ្ចប់ជំនួយសន្តិសុខថ្មីសម្រាប់អ៊ុយក្រែន ដើម្បី ប្រយុទ្ធប្រឆាំងនឹងការឈ្លានពានរបស់កងកម្លាំងរុស្ស៊ី នៅក្នុងកិច្ចប្រជុំនៃសម្ព័ន្ធមិត្តកាលពីថ្ងៃចន្ទ ទី២៣ ឧសភា។ នេះបើយោងតាមការចេញផ្សាយដោយសារព័ត៌មាន CNA នៅថ្ងៃទី២៤ ខែឧសភា ឆ្នាំ២០២២។

នៅក្នុងការជួបជុំលើកទីពីរ ប្រទេសជិត១៤ និងអង្គការ ដែលបង្កើតក្រុមទំនាក់ទំនងការពារជាតិអ៊ុយក្រែន បានជួបប្រជុំគ្នាតាមប្រព័ន្ធអ៊ីនធឺណិត ដើម្បីពិភាក្សាអំពីការជួយអ៊ុយក្រែន ហើយប្រទេសចំនួន២០ បានសន្យាផ្តល់អាវុធ គ្រាប់រំសេវ និងការផ្គត់ផ្គង់ផ្សេងទៀត ដើម្បីគាំទ្រដល់ទីក្រុងគៀវ ។

ក្រុមនេះត្រូវបានពន្យល់ដោយរដ្ឋមន្ត្រីការពារជាតិអ៊ុយក្រែន លោក Oleksiy Reznikov អំពីស្ថានភាពបច្ចុប្បន្ននៃសង្រ្គាម ដែលមានរយៈពេលបីខែ ដែលក្នុងនោះភាគីទាំងពីរកំពុងប្រយុទ្ធគ្នា នៅតាមខ្សែបន្ទាត់ជួរមុខដ៏វែងមួយនៅលើទឹកដី ដែលរុស្ស៊ីបានដណ្តើមកាន់កាប់នៅភាគខាងកើត និងខាងត្បូងរបស់អ៊ុយក្រែន។

លោក Austin បាននិយាយថា «ថ្ងៃនេះ រួមជាមួយរដ្ឋមន្ត្រី Reznikov និងក្រុមរបស់គាត់ យើងទទួលបានការយល់ដឹងកាន់តែច្បាស់ និងចែករំលែកអំពីតម្រូវការជាអាទិភាពរបស់អ៊ុយក្រែន និងស្ថានភាពនៅលើសមរភូមិ»។

លោកបាននិយាយថា«ប្រទេសជាច្រើនកំពុងបរិច្ចាគគ្រាប់កាំភ្លើងធំដែលចាំបាច់បំផុត ប្រព័ន្ធការពារឆ្នេរសមុទ្រ និងរថក្រោះ និងរថពាសដែកផ្សេងទៀត»។ លោកបានបន្ថែមថា អ្នកផ្សេងទៀតកំពុងផ្តល់ការបណ្តុះបណ្តាលសម្រាប់យោធាអ៊ុយក្រែន។

លោកបាននិយាយថា ប្រទេសដាណឺម៉ាក បានប្តេជ្ញាបញ្ជូនប្រព័ន្ធមីស៊ីលប្រឆាំងនាវា Harpoon ហើយសាធារណរដ្ឋឆេកកំពុងផ្តល់ឧទ្ធម្ភាគចក្រវាយប្រហារ រថក្រោះ និងប្រព័ន្ធរ៉ុក្កែត។

ជាមួយគ្នានេះ Harpoons គឺជា មីស៊ីល ដែល អាច ហោះ កាត់ ផ្ទៃ សមុទ្រ ដើម្បី កំណត់ គោលដៅ នាវា បាន ចម្ងាយ ៣០០ គីឡូម៉ែត្រ ពី ឆ្នេរសមុទ្រ ។ ជាធម្មតា Harpoons ត្រូវបានដំឡើងនៅលើកប៉ាល់ ឬយន្តហោះ ប៉ុន្តែដាណឺម៉ាក គឺជាប្រទេសតែមួយគត់ ដែលទទួលបានប្រព័ន្ធនៅលើដី សម្រាប់ការការពារឆ្នេរសមុទ្រ។

លើសពីនេះ ដាណឺម៉ាកនឹងបន្ថែមប្រព័ន្ធការពារដល់កំពង់ផែសមុទ្រខ្មៅ Odessa របស់អ៊ុយក្រែន ដែលត្រូវបានគេជឿថា ស្ថិតនៅក្រោមការគំរាមកំហែងនៃការឈ្លានពានរបស់រុស្ស៊ីពីសមុទ្រ។

មីស៊ីលHarpoonsក៏អាចវាយប្រហារទៅដល់កំពង់ផែ Sevastopol ជាកន្លែងដែលកងនាវាសមុទ្រខ្មៅរបស់រុស្ស៊ីមានមូលដ្ឋានផងដែរ៕

ប្រភព៖  CNA