យោងតាមផេកផ្លូវការរបស់ ឯកឧត្តម ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បង្ហោះនៅល្ងាចថ្ងៃទី២ ខែវិច្ឆិកា ឆ្នាំ២០២២ ម្សិលមិញនេះ បានសរសេរទាំងស្រុងថា ក្រោយពីបានទទួលគោលការណ៍ដ៍ខ្ពង់ខ្ពស់បំផុតពី សម្តេច អគ្គមហាសេនាបតី តេជោ ប្រមុខរាជរដ្ឋាភិបាល រួចមក អង្គភាពស៊ីម៉ាក់ បានសហការយ៉ាងជិតសិ្នទ្ធជាមួយមិត្តជប៉ុន ក្នុងការបញ្ជូនក្រុមគ្រូជំនាញបច្ចេកទេស បោសសំអាតគ្រាប់មីន ដើម្បីជួយផ្តល់ការហ្វឹកហ្វឺន ជូនអ្នកដោះមីនអ៊ុយក្រែន។
ឯកឧត្តម ហេង រតនា ក៏បានបញ្ជាក់ថា ក្រោយមានគោលការណ៍នេះអង្គភាពស៊ីម៉ាក់និងភាគីជប៉ុន បានដំណើរការពិភាក្សាគ្នាយ៉ាងមមាញឹកបំផុត។ ជាផែនការក្រុមដំបូងអាចចេញដំណើរនៅដើមខែធ្នូ ឆ្នាំ២០២២នេះ និងក្រុមទី២អាចបំពេញបេសកកម្មនេះនៅក្នុងត្រីមាសទី១ ឆ្នាំ២០២៣។
ឯកឧត្តម ហេង រតនា បន្តថា អង្គភាពស៊ីម៉ាកមានមោទនភាព ចំពោះបេសកកម្មនេះ ដែលមិនត្រឹមតែបានចូលរួមចំណែក ជួយប្រជាជនអ៊ុយក្រែន រំដោះខ្លួនពីការស្លាប់ រងរបួស ដោយសារគ្រាប់មីន និងសំណល់យុទ្ធភណ្ឌសង្គ្រាមប៉ុណ្ណោះទេ បន្ថែមលើសនេះបេសសកម្មនេះ ក៏ជាការចូលរួមលើកកម្ពស់មោទនភាពជាតិក្រោមការដឹកនាំដ៍ប៉ិនប្រសព្វ និងគតិបណ្ឌិតរបស់សម្តេចតេជោ ដែលបានប្រែក្លាយប្រទេសជាតិ និងប្រជាជនឱ្យរួចផុតពីភ្លក់សង្គ្រាមជាច្រើនសទវត្ស ក្នុងព្រះរាជាណាចក្រនេះ ស្គាល់នូវសន្តិភាពដ៍ពេញលេញពិតប្រាកដមួយ សំរាប់កម្ពុជា ដោយបានលើកកិតិ្តយសជាតិឱ្យស្មើមុខស្មើមាត់ក្នុងឆាកអន្តរជាតិ ៕
